لاہور (این این آئی) پاکستان کے فرنیچر کونسل (پی ایف سی) کے چیف ایگزیکٹو میاں کاشف اشفاق نے کہا ہے کہ آئی ایم ایف کے 6 ارب ڈالر کے پیکیج سے معیشت میں بہتری، سرمایہ کاروں کے اعتماد کی بحالی اور سٹرکچرل ریفارمز کے ذریعے پائیدار ترقی کو یقینی بنانے میں مدد ملے گی۔ میڈیا سے گفتگو کرتے ہوئے انہوں نے کہا کہ اس پیکج سے کرنسی کی قدر میں مسلسل گراوٹ، مالیاتی خسارے اور افراط زر پر
قابو پانے میں مدد ملے گی اور ادائیگیوں کے دبائو میں کمی آئے گی۔ کاروباری برادری یقین رکھتی ہے کہ وزیر اعظم عمران خان کے اقتصادی وژن کے مطابق پالیسیوں پر عملدرآمد سے معاشی ترقی کی راہ ہموار ہوگی اور افراط زر میں کمی آئے گی۔ انہوں نے مزید کہا کہ ملک کو گزشتہ برس کے دوران برآمدات اور غیر ملکی براہ راست سرمایہ کاری میں کمی، ٹیکس ٹو جی ڈی پی کے تناسب میں کمی اور پبلک سیکٹر اداروں کی ابتر صورتحال کا سامنا رہا ہے لیکن ان چیلنجز پر حکومت اور نجی شعبے کے باہمی تعاون اور مذاکرات کے ذریعے قابو پایا جا جاسکتا ہے۔ میاں کاشف نے پڑوسی ممالک خاص طور پر افغانستان اور ایران کے ساتھ تجارتی تعلقات کے فروغ کی ضرورت پر زور دیتے ہوئے کہا کہ اس ضمن میں فرنیچر کی تجارت میں اضافہ کے لئے پی ایف سی اہم کردار ادا کر سکتی ہے۔ پاکستانی فرنیچر کی برطانیہ، امریکہ، سری لنکا سمیت خلیجی ریاستوں میں بہت مانگ ہے اور فرنیچر کی برآمدات کو فروغ دینے کے لئے بھی دنیا بھر میں نئی منڈیوں کی تلاش کی بھی اشد ضرورت ہے۔ انہوں نے کہا کہ پاکستان میں تیار ہونے والے خطاطی کی کندہ کاری والے فرنیچر کی مقامی اور بین الاقوامی منڈیوں میں بہت زیادہ مانگ ہے جس کیلئے علاقائی اور عالمی سطح پر مارکیٹنگ کی حکمت عملی کی تیاری ضروری ہے۔ دنیا بھر کے ممالک آپس میں آزادانہ تجارت کے معاہدے کر رہے ہیں اس لئے پاکستان کو بھی اس ضمن میں تیزی سے پیشرفت کی ضرورت ہے۔ انہوں نے مزید کہا کہ افراتفری پیدا کرنے کی بجائے حکومت کے مثبت اقدامات اور پالیسیوں کو اجاگر کرنے کی ضرورت ہے کیونکہ غیر یقینی صورتحال میں اقتصادی بحالی ممکن نہیں ہوگی بلکہ اس کے مزید برے اثرات مرتب ہونگے۔ انہوں نے کہا کہ مقامی سرمایہ کاروں کا موجودہ حکومت پر اعتماد بحال ہو
رہا ہے اور وہ اقتصادی بحالی میں اپنا کردار ادا کر رہے ہیں۔ میاں کاشف اشفاق نے کہا کہ میڈیا کسی بھی ملک میں سرمایہ کاری کے ماحول کے فروغ میں اہم کردار ادا کرتا ہے اس لئے میڈیا کو کاروباری آسانیوں اور سرمایہ کاری کے مواقع کے حوالے سے اقدامات کو اجاگر کرنا چاہئے۔
