لاہور(مانیٹرنگ ڈیسک) سوئی ناردرن گیس کمپنی نے صوبہ پنجاب کی ٹیکسٹائل انڈسٹری کے لیے گیس سستی کر دی، نوٹی فیکشن بھی جاری کردیا گیا۔ تفصیلات کے مطابق سوئی ناردرن گیس کمپنی کا کہنا ہے کہ ملک بھر میں گیس کے نرخ یکساں کر دیے گئے ہیں جس کے بعد پنجاب میں گیس کے نرخ 1400 سے کم کر 600 روپے فی یونٹ کر دیے گئے ہیں۔ اس سے قبل پنجاب کی ٹیکسٹائل انڈسٹری کے لیے
گیس کے نرخ دیگر صوبوں کے مقابلے میں زیادہ تھے۔ صوبہ پنجاب میں مہنگی گیس ہونے کی وجہ سے گزشتہ پانچ سال کے دوران 100 سے زائد ٹیکسٹائل ملز بند ہوگئی تھیں۔ ٹیکسٹائل ملز مالکان کا کہنا ہے کہ گیس کے نرخوں میں کمی کے فیصلے سے پنجاب کی بند انڈسٹری چل سکے گی۔ دوسری جانب اپٹما رہنما گوہر اعجاز نے کہا کہ گیس کے نرخ کم کرنے سے ٹیکسٹائل برآمدات میں اضافہ ہوسکے گا۔
