اسلام آباد/کراچی(آئی این پی /مانیٹرنگ ڈیسک)روپے کی قدر میں کمی، انٹرا بینک میں ڈالر ساڑھے چار روپے مہنگا، ڈالر کی قیمت 110روپے تک جا پہنچی، ایکسپورٹرز گھبراہٹ کا شکار۔نجی ٹی وی اے آر وائی نیوز کی
رپورٹ کے مطابق ڈالر مہنگا ہو گیا جبکہ روپے کی قدر میں کمی ہوئی ہے ۔ انٹرا بینک میں ڈالر ساڑھے چار روپے مہنگا ہو گیا جس سے ڈالر کی قیمت اوپن مارکیٹ میں 110روپے تک جا پہنچی ہے۔ اقتصادی ماہرین ڈالر کی قیمت میں اضافے اور روپے کی قدر میں کمی کے نتیجے میں مہنگائی اور افراط زر کا خدشہ ظاہر کر رہے ہیں جبکہ ایکسپورٹرز بھی گھبراہٹ کا شکار ہو چکے ہیں۔ ترجمان اسٹیٹ بنک نے کہا کہ بیرونی ادائیگیوں کی وجہ سے مارکیٹ میں دبائو آتا رہتا ہے‘ ڈالر کی قیمت میں اگر زیادہ اضافہ ہوا تو مداخلت کرینگے‘ انٹربینک مارکیٹ میں امریکی ڈالر کی قیمت میں اضافے پر نظر رکھے ہوئے ہیں۔ جمعہ کو انٹربینک میں امریکی ڈالر تین روپے مہنگا ہوگیا۔ اضافے کے بعد امریکی ڈالر 105 روپے 50 پیسے سے بڑھ کر 108روپے 50 پیسے کا ہوگیا۔ اوپن مارکیٹ میں امریکی ڈالر کی قیمت 109 روپے 50 پیسے ہوگئی ہے۔ ترجمان اسٹیٹ بینک نے امریکی ڈالر کی قیمت میں اضافے پر اپنا ردعمل دیتے ہوئے کہا کہ بیرونی ادائیگیوں کی وجہ سے مارکیٹ میں دبائو آتا رہتا ہے۔ ڈالر کی قیمت میں بہت زیادہ اضافہ ہوا تو مداخلت کرینگے۔ انٹربینک مارکیٹ میں ڈالر کی قیمت میں اضافہ پر نظر رکھے ہوئے ہیں۔
