اسلام آباد (آئی این پی )قومی اسمبلی میں وفاقی وزیر برائے پارلیمانی امور شیخ آفتاب نے کہا ہے کہ نیو اسلام آباد ائیر پورٹ کا 95فیصد کام مکمل ہوچکا،وزیراعظم میاں محمد نوازشریف 14اگست کو اس کا افتتاح کریں گے،وزیراعظم نے ملک کے تمام پرانے ائیرپورٹس کی حالت بہتر بنانے کی بھی ہدایت کی ہے،70کروڑ روپے سے پشاور ائیرپورٹ کی تزئین و آرائش مکمل ہوچکی
مزید تین ارب روپے کے منصوبے سے ائیرپورٹ کو کشادہ کیا جارہا ہے۔وہ منگل کو ایوان میں جماعت اسلامی کے رکن صاحبزادہ یعقوب کی جانب سے سول ایوی ایشن کی کارکردگی زیربحث لانے کی تحریک پر بحث سمیٹ رہے تھے۔قبل ازیں ارکان اسمبلی نے سول ایوی ایشن کی کارکردگی کو ناقص قرار دیتے ہوئے اسے عصر حاضر کے تقاضوں کے مطابق لانے کیلئے اقدامات کی ضرورت پر زور دیا۔صاحبزادہ یعقوب خان نے کہا کہ سول ایوی ایشن کی کارکردگی زیربحث لائی جائے اور کارکردگی بہتر بنانے کیلئے تجاویز دی جائیں۔غلام سرور نے کہا کہ نیو اسلام آباد ائیرپورٹ کیلئے 38 ارب روپے کا تخمینہ لگایا گیا مگر اخراجات 1کھرب سے تجاوز کرگئے اس پر بھی بحث ہونی چاہیے۔ایاز سومرو نے کہا کہ اگر ائیرپورٹ نجی شعبے کو دیئے گئے تو تباہ ہوجائیں گے،موہنجوداڑو ائیرپورٹ بھی تقریباً نان آپریشنل ہے،ہفتے میں کبھی کبھار ایک فلائیٹ آتی ہے،پی آئی اے کے سی ای او کو 50لاکھ تنخواہ دی جاتی ہے۔اعجاز جاکھرانی نے کہا کہ سول ایوی ایشن کی ناکامی کی وجہ سے ملکی ائیرپورٹس تباہی کا شکار ہیں،
کراچی اور لاہور کے علاوہ کوئی ائیرپورٹ معیاری نہیں،سول ایوی ایشن کی پالیسی تبدیل ہونی چاہیے۔شیخ آفتاب نے کہا کہ ائیرپورٹس کو بہتر بنانے کی ضرورت ہے،بے نظیر ائیرپورٹ کو کشادہ کیا گیا ہے،رن وے کو بہتر کیا ہے،70کروڑ روپے سے پشاور ائیرپورٹ کی تزئین و آرائش کی ہے،3ارب سے اسے کشادہ کیا جارہا ہے،14اگست کو نیو اسلام آباد ائیرپورٹ کا وزیراعظم افتتاح کریں گے اور بین الاقوامی فلائٹس کا اجراء ہوگا،پاکستان کو سرمایہ کاری کیلئے موزوں قرار دیا جارہا ہے،
سی پیک کی وجہ سے دنیا متوجہ ہورہی ہے،سی پیک کی وجہ سے اسلام آباد ائیرپورٹ کو مزید وسیع کیا جارہا ہے،پانی کیلئے راما ڈیم بنایا گیا ہے،95فیصد کام مکمل ہے،سڑکیں تیزی سے بن رہی ہیں،مزید بہتری لانے کی ضرورت ہے،ماضی میں پی آئی اے زوال پذیر رہی،اب ڈرائی لیز پر جہاز لیے گئے ہیں،جن کی وجہ سے ادارے کی کارکردگی بہتر ہوئی ہے۔
