بیجنگ (آئی این پی)چین نے ملکی جامعات سے تعلیم مکمل کرنے والے غیر ملکی طلباء کے لیے ملازمت کے مواقع آسان بنانے کا اعلان کردیا۔ چین کی وزارت انسانی وسائل اور سماجی تحفظ ،وزارت خارجہ اور وزارت تعلیم کی جانب سے جمعہ کو ایک تفصیلی پالیسی جاری کی گئی ہے جس میں چین تعلیم حاصل کرنے والے غیر ملکی طلباء کو مطلع کیا گیا ہے کہ وہ تعلیم مکمل ہونے کے بعد چین کے مختلف اداروں میں روزگار کے مواقع حاصل کر سکتے ہیں۔ پالیسی سے چین میں زیر تعلیم 14ہزار پاکستانی طلباء بھی تعلیم مکمل ہونے کے بعد روزگار کے مواقعوں سے استفادہ کر سکتے ہیں۔
پالیسی میں طلباء کیلئے6شرائط پر پورا اترنا ضروری بتایا گیا ہے جس میں کم ازکم عمر18سال ، صحت کا بہترین ہونا ،کسی بھی قسم کے جرائم سے دور رہنا، بہترین تعلیمی قابلیت ،نظم وضبط کا پابند ہونا اورمذکورہ شعبہ کے ڈگری حاصل کرنا ہے۔غیر ملکی طلباء کو روزگار کے مواقع حاصل کرنے کیلئے سب سے پہلے ورک پرمٹ حاصل کرنا ہوگا۔
