کراچی (نیوزڈیسک) ڈالر کے سٹے بازوں کی اب ایک نہیں چل رہی ۔ دو دن کے دوران ڈالر کی قدر میں 70 پیسے کی کمی ہوگئی ۔ اسٹیٹ بینک اور ایکسچینج کمپنیوں نے ڈالر کی سٹے بازوں کا دھندا چوپٹ کردیا ۔ فاریکس ایکسچنج کمپنیوں میں ڈالر کے خریداروں کی بجائے فروخت کرنے والوں کا تانتا بندھ گیا ۔
اسٹیٹ بینک نے ایکسچینج کمپنیوں کو 105 روپے 90 پیسے میں ڈالر کی سپلائی شروع بھی کردی ہے اور دو دن کے دوران 7 لاکھ ڈالر ایکسچینج کمپنیوں کو جاری کیے جاچکے ہیں ۔ جبکہ ایکسچینج کمپنیوں کی جانب سے ڈالر کی درآمدات کا سلسلہ بھی جاری ہے جس کے باعث اس کی قیمت میں کمی آنا شروع ہوگئی ہے ۔ آج انٹر بینک مارکیٹ میں ڈالر 8 پیسے کمی سے 105 روپے 40 پیسے جبکہ اوپن مارکیٹ میں 20 پیسے کمی سے 106 روپے 20 پیسے میں فروخت ہورہا ہے ۔