لاہو ر( این این آئی)وزیراعلیٰ پنجاب محسن نقوی نے رات گئے گوجرانوالہ میں مفت آٹے کے 24/7اوپن سیل پوائنٹس کے اچانک دورے کیے۔وزیر اعلیٰ محسن نقوی نے سیل پوائنٹس پر موجود مرد و خواتین سے آٹے کی فراہمی کے حوالے سے دریافت کیا۔ آٹا لینے والے مرد و خواتین نے وفاقی و پنجاب حکومت کے خصوصی رمضان ریلیف پیکیج کو سراہا
اور وزیر اعلیٰ محسن نقوی سے گفتگو کرتے ہوئے بتایا کہ تصدیق سے آٹا تھیلا ملنے تک صرف 2 منٹ لگے اور سیل پوائنٹ پر کسی قسم کی دشواری کا سامنا نہیں کرنا پڑا اورہم اس مفت آٹے کے خصوصی پیکیج سے بہت خوش ہیں۔ وزیر اعلیٰ محسن نقوی نے سیل پوائنٹس پر موجود مرد و خواتین سے آٹے کی تقسیم کے حوالے سے مسائل بارے دریافت کیا۔بعض شہریوں نے شناختی کارڈز کی تصدیق نہ ہونے کے بارے میںشکایات کیں۔ وزیراعلیٰ محسن نقوی نے شہریوں سے استفسار کیا کہ کیا آپ نے اپنا اندراج بے نظیر انکم سپورٹ پروگرام میں کرایا ہے جس پر اکثر شہریوں نے کہا کہ ہمارا اندراج بے نظیر انکم سپورٹ پر نہیں ہوا۔وزیراعلیٰ محسن نقوی نے کہا کہ شہری پہلے بے نظیر انکم سپورٹ پروگرام میں اپنا اندراج کرائیں تاکہ انہیں مفت آٹے کے سیل پوائنٹ پر کسی قسم کی دشواری پیش نہ آئے ۔وزیر اعلیٰ محسن نقوی نے اپنے سٹاف کو سیل پوائنٹس پر موجود شہریوں کی بے نظیر انکم سپورٹ پروگرام میں رجسٹریشن کرانے کی ہدایت کی ۔وزیراعلیٰ محسن نقوی نے سیل پوائنٹس پرموجود عملے کو ہدایت کی کہ شہریوں کو اچھے طریقے سے گائیڈ کیا جائے۔سیل پوائنٹس کے عملے نے سسٹم سلو ہونے کے بارے میںوزیراعلیٰ کو آگاہ کیا ۔وزیر اعلی محسن نقوی نے سیل پوائنٹس پرموجود ٹرک میںآٹے کے تھیلوں کا وزن کرایا،آٹے کے تھیلے کا وزن 10 کلو پورا تھا ۔انسپکٹر جنرل پولیس ڈاکٹر عثمان انور بھی ہمراہ تھے۔بعدازاںوزیراعلیٰ محسن نقوی نے ڈسٹرکٹ ہیڈ کوارٹرہسپتال گوجرانوالہ کے ٹراما سینٹر کااچانک دورہ کیا ۔
وزیراعلیٰ محسن نقوی نے ایمرجنسی کیلئے نئی عمارت کی تعمیرکااعلان کیا۔وزیراعلیٰ محسن نقوی نے ٹراما سینٹرمیںعلاج معالجے کی سہولتوں کا جائزہ لیا۔وزیراعلیٰ محسن نقوی نے آئی سی یومیں وینٹی لیٹرز بیڈز کا بھی معائنہ کیا۔وزیراعلیٰ محسن نقوی نے مریضوں کی عیادت کی اوران کی خیریت دریافت کی۔ وزیراعلیٰ محسن نقوی نے مریضوں اورتیمارداروں سے فراہم کردہ طبی سہولتوں کے بارے میں دریافت کیا۔
وزیراعلیٰ محسن نقوی نے ہسپتال میں صفائی کے انتظامات کو بہتر بنانے کی ہدایت کرتے ہوئے کہا کہ ڈاکٹروں کو مریضوں سے شفقت کے ساتھ پیش آ نا چاہیے۔ ڈاکٹر کاایک میٹھا بول مریض کی آدھی بیماری دور کر دیتا ہے۔انہوںنے کہا کہ علاج معالجہ کی سہولتوں کو بہتر بنانے کیلئے کوشاں ہیں۔بعدازاںوزیراعلیٰ محسن نقوی نے گوجرانوالہ کے تھانہ اروپ کی حدود میں زیادتی کا نشانہ بننے والی ماں بیٹی کی رہائشگاہ پہنچے۔وزیراعلیٰ محسن نقوی نے ماں بیٹی سے ہمدردی کااظہار کیا اوران کے لئے 10لاکھ روپے مالی امداد کا اعلان کیا ۔انہوںنے کہا کہ حکومت آپ کے ساتھ کھڑی ہے اور آپ کی ہرممکن مدد کی جائیگی۔انسپکٹر جنرل پولیس پنجاب ڈاکٹر عثمان انور،گوجرانوالہ کے آر پی او،کمشنر ،سی پی او اورڈپٹی کمشنر بھی اس موقع پرموجود تھے۔
