لاہور (مانیٹرنگ، این این آئی) تحریک انصاف کے رہنما فواد چوہدری نے اپنے ٹوئٹر پیغام میں کہا ہے کہ آج عمران خان کے خلاف دو نئی ایف آئی آر درج کی گئیں، ایک ایف آئی آر کوئٹہ اور دوسری ایف آئی آر اسلام آباد میں درج کی گئی ہے ان دو نئے مقدموں کے بعد عمران خان پر مقدموں کی تعداد

پچھتر ہو گئی ہے، اس حکومت میں نہ کوئی شرم ہے نہ حیا۔ واضح رہے کہ اسلام آباد پولیس کو دھمکیاں دینے کے الزام میں چیئرمین پاکستان تحریک انصاف و سابق وزیراعظم عمران خان سمیت 150 افراد کیخلاف مقدمہ درج کرلیا گیا۔لاہور کے تھانہ ریس کورس میں عمران خان، شبلی فراز سمیت 150کارکنوں کیخلاف ایس ایچ او تھانہ سیکرٹریٹ اسلام آباد ندیم طاہر کی مدعیت میں مقدمہ درج کیا گیا۔مقدمے میں کہا گیا ہے کہ اسلام آباد پولیس کی ٹیم ملزم عمران خان کی گرفتاری کے لئے زمان پارک پہنچی تو ڈنڈا بردار افراد نے گھیراؤکر لیا اور پولیس اہلکاروں کو سنگین نتائج کی دھمکیاں دی گئیں۔ایف آئی آر میں مزید کہا گیا ہے کہ ہجوم نے پولیس کو جان سے مارنے کی دھمکیاں دیں، عمران خان نے باہم مشورہ ہو کر ساری پلاننگ کی، ڈنڈا بردار افراد نے پولیس سے کہا ایک انچ بھی بڑھے مار دیں گے۔