لاہور ( این این آئی) پاکستان کرکٹ بورڈ کے سابق چیئرمین خالد محمود نے کہا ہے کہ رمیز راجہ نے جیسے بتایا اتنے برے حالات بھی نہیں تھے۔انہوں نے ایک انٹرویو کے دوران گفتگو کرتے ہوئے کہا کہ ہر بار نئی حکومت آنے کے بعد نیا کرکٹ بورڈ کا سربراہ آنے کے خلاف ہوں

کیونکہ کام کرنے والے کو ٹائم ملنا چاہیے۔ خالد محمود نے کہا کہ کئی کھلاڑیوں پر الزامات لگے لیکن کسی کے خلاف ثبوت نہیں آئے، عامر سہیل کا نام میرے ذہن میں آرہا ہے لیکن وہ بالکل کلیئر تھے۔انہوں نے مزید کہا کہ کچھ کھلاڑیوں پر اور الزامات لگے، ملک قیوم نے معاملے کی تحقیقات کیں، کمیشن بنا کر تحقیقات کرائی گئیں، وسیم اکرم اور کچھ لوگوں کو اہم عہدے نہ دینے کی سفارش کی تھی۔یاد رہے کہ دو روز قبل لاہور میں ایک تقریب سے خطاب کرتے ہوئے سابق چیئرمین پی سی بی رمیز راجہ نے کہا تھا کہ پاکستان کرکٹ فکسنگ کے اندھیرے سے گزری، شاید میں واحد تھا جس کا اس طرف دھیان نہیں گیا تھا، اس کی وجہ یہ تھی کہ مجھے تعلیم نے اچھے برے کی پہچان دی۔رمیز راجہ کا کہنا تھا کہ جب تسلسل کو توڑتے ہیں تو کرکٹ کی ایکسیلینس نہیں ہوتی، جب تک طریقہ کار مضبوط نہیں ہوں گے کامیابی نہیں مل سکتی۔