لاہور ٗ کراچی(مانیٹرنگ ڈیسک ٗ این این آئی)لاہور میں گندم کے بعد مرغی کے گوشت کی قیمت میں بھی بڑی کمی ہو گئی۔مارکیٹ اعلامیے کے مطابق آج مرغی کے گوشت کی قیمت میں 70 روپے فی کلو کمی آئی ہے، فی کلو مرغی کے گوشت کی قیمت 504 روپے پر آ گئی ہے، تاہم انڈوں کی قیمت میں کمی نہ ہو سکی اور قیمت 289 روپے درجن برقرار ہے۔

دوسری جانب کراچی میں گندم کی اوپن مارکیٹ کریش کرگئی اور صرف دو دن میں گندم 30 روپے فی کلو سستی ہوگئی۔چیئرمین ہول سیل گروسرز ایسوسی ایشن عبدالرئوف ابراہیم نے بتایا کہ گندم کے ریٹ 130 سے گر کر 100 روپے فی کلو پر واپس آگئےتاہم اب دکانوں پر عوام کیلئے آٹا سستا کرانا ہوگا۔عبدالرئوف ابراہیم نے مزید کہا کہ گندم کے ذخیرہ اندوزوں اور سٹے بازوں کے خلاف کریک ڈان کے حکومتی اعلان سے اوپن مارکیٹ سے گندم میں سٹے بازی کرنے والے فرار ہوگئے۔خیال رہے کہ گزشتہ روز سے کراچی میں دو ماہ بعد آٹے اور گندم کی قیمت میں پہلی بارکمی دیکھی جارہی ہے۔وزارت غذائی تحفظ کے مطابق روس سے گندم کی پہلی کھیپ کے 2جہاز بھی گزشتہ روز پاکستان پہنچ گئے، روس سے مجموعی طور پر ساڑھے 7 لاکھ ٹن گندم درآمد کی جائے گی۔ترجمان وزارت غذائی تحفظ کا کہنا ہے کہ روس کے علاوہ بھی مختلف ممالک سے گندم لے کرجہاز کراچی پورٹ پہنچ چکے ہیں۔ ساڑھے3 لاکھ ٹن گندم پہلے ہی کراچی بندرگاہ پرپہنچ چکی ہے۔