کراچی(این این آئی)نیوزی لینڈ کے سابق کپتان کین ولیمسن پاکستانی سر زمین پر سب سے طویل اننگز کھیلنے والے کیوی کھلاڑی بن گئے۔کیوی ٹیم کے کھلاڑی کین ولیمسن نے کراچی ٹیسٹ میں پورے 600 منٹس تک بیٹنگ کی، اس سے قبل مارٹن کرو نے 1990 میں 552 منٹس تک بیٹنگ کی تھی۔یہ پاکستان میں کسی بھی غیر ملکی کی تیسری طویل اننگز ہے،

بھارت کے راہول ڈریوڈ نے راولپنڈی میں 740 اور آسٹریلوی بیٹر مارک ٹیلر نے پشاور میں 720 منٹس وکٹ پر قیام کیا تھا۔کین ولیمسن 600 منٹس بیٹنگ کر کے کراچی میں سب سے طویل بیٹنگ کرنیوالے غیر ملکی ہوگئے ہیں اور وہ کراچی ٹیسٹ کی پہلی اننگز میں 200 رنز بنا کر ناٹ آؤٹ رہے۔قومی کرکٹ ٹیم کے بولر نعمان علی کے مطابق نیوزی لینڈ کے بیٹسمین کین ولیمسن کو آؤٹ کرنے کے چانس پورے تھے،سیفی بھائی نے کوشش بھی کی لیکن وہ نہ کرسکے۔کراچی ٹیسٹ کے تیسرے روز سرفراز نے کین ولیمسن کو آؤٹ کرنے کے دو مواقع ضائع کیے، میچ کے بعد کی گئی گفتگو میں نعمان علی کے مطابق آؤٹ کرنے کے چانس پورے تھے سیفی بھائی نے کوشش بھی کی لیکن وہ نہیں ہوسکے۔نعمان علی نے کہا کہ گیند بھی لیگ اسٹمپ پر فل تھا جس کی وجہ سے سرفراز کو بھی مشکل ہوئی انہوں نے کوشش کی تاہم وہ نہیں کرسکے۔یاد رہے کہ گزشتہ روز سرفراز احمد نے کین ولیمسن کو آؤٹ کرنے کے دو مواقع ضائع کردیے تھے، سابق کپتان نے ولیمسن کو آؤٹ کرنے کا پہلا موقع 15 رنز پر مس کیا تھا جس کے بعد ولیمسن کھیل کے تیسرے روز تیسری اور چوتھے روز ڈبل سنچری بنانے میں کامیاب ہوگئے۔