لاہور( این این آئی)لاہور سمیت پنجاب بھر میں خون پتلا کرنے والے انجیکشن ہیپرین کی شدید قلت ہوگئی۔دل کے مریضوں کے گاڑھے خون کو پتلا کرنے والا انجیکشن ہیپرین کی شدید قلت کے باعث صوبے کی سب سے بڑی علاج گاہ میو ہسپتال میں دل کے آپریشن روک دئیے گئے۔

ذرائع کے مطابق انجیوگرافی، انجیوپلاسٹی سمیت دل کی شریانوں کا معائنہ کرنے والی کیتھ لیب بھی گزشتہ 5 روز سے بند ہے۔ خون کی منتقلی اور صفائی کے لیے استعمال ہونے والی کٹس ختم ہونے سے پلازما فیرائسز بھی روک دئیے گئے۔پاکستان میڈیکل ایسوسی ایشن کے صدر نے میو ہسپتال میں ادویات کی قلت کو انتظامی نااہلی قرار دے دیا۔پاکستان فارماسوٹیکل ایسوسی ایشن کے مطابق امپورٹ مشکلات کے باعث جان بچانے والی ادویات کا اسٹاک ختم ہوتا جارہا ہے۔دوسری جانب میوہاسپتال کے سی ای او پروفیسر ثاقب سعید کا موقف ہے کہ بیشتر ٹینڈر دئیے مگر ادویات کی قلت کے باعث کوئی کمپنی ٹینڈر قبول نہیں کررہی۔