اسلام آباد(مانیٹرنگ ڈیسک)پاکستان مسلم لیگ(ن) نے کہاہے کہ تحریک انصاف کوسمجھ نہیں آرہی کہ اب کون سی چال چلے ۔مسلم لیگ(ن) کے ارکان اسمبلی دانیال عزیزاورطارق فضل چوہدری نے مشترکہ پریس کانفرنس کی۔دانیال عزیزنے کہاکہ عمران خان کے پاس صرف کرکٹ کاتجربہ ہے ۔انہوں نے کہاکہ الیکشن کمیشن پرالزامات لگانے پرعمران خان کوشرم آنی چاہیے۔اس موقع پرطارق فضل چوہدری نے کہاکہ الیکشن کمیشن کے ارکان کوہٹانے کاطریقہ آئین میں موجود ہے۔
چیئرمین تحریک انصاف کی جارحانہ پریس کانفرنس کے جواب میں مسلم لیگ (ن) کے رہنماؤں نے جوابی وار کئے ہیں۔ دانیال عزیز کہتے ہیں کہ عمران خان کو نئی سیاسی چال سمجھ نہ آئی تو الیکشن کمیشن ارکان سے استعفے مانگ لئے۔ ان ارکان کو ہٹانے کا آئینی طریقہ موجود ہے۔ اوچھے ہتھکنڈوں اور دھمکیوں سے کام نہیں چلے گا۔ تحریک انصاف پارلیمانی سیاست میں ناکام ہو چکی ہے۔ خان صاحب شرم اور استعفوں کا رجسٹر اب الماری میں رکھ دیں۔ دانیال عزیز نے عمران خان کو جوابی ڈیڈ لائن دیتے ہوئے کہا کہ خیبر پختونخوا حکومت نے بجلی کے منصوبوں کے فنڈز سٹے میں لگا دیئے ہیں۔ عمران خان دو ہفتوں میں اس معاملے پر جواب دیں ورنہ وہ سونامی کو بھول جائیں گے۔ لیگی رہنماء طارق فضل چودھری نے کہا کہ دوسروں پر انگلیاں اٹھانے والی تحریک انصاف کے اپنے 6 ارکان سٹے لے کر قومی اسمبلی میں موجود ہیں۔ عمران خان کو روز سمجھانا پڑتا ہے کہ قوم کا مستقبل سڑکوں پر نہیں بلکہ پارلیمنٹ میں ہے