اسلام آباد (این این آئی)وفاقی وزیر اور ترجمان پیپلزپارٹی پارلیمنٹرینز شازیہ مری نے کہا ہے کہ پی ٹی آئی فارن فنڈنگ کیس کا جلد فیصلہ سنایا جائے۔ اپنے بیان میں شازیہ مری نے کہاکہ غیر ملکی اور ممنوعہ فنڈنگ کا حساب ہونا چاہیے،غیر ملکی ممنوعہ فنڈنگ کی وجہ سے
عمران خان ریاست کی رٹ کو چیلنج کر رہے ہیں، ریکارڈ سے ثابت ہو چکا ہے کہ عمران خان کو ساڑھے سات ملین امریکی ڈالر کی ممنوعہ فنڈنگ ہوئی ہے۔ انہوں نے کہاکہ پی ٹی آئی ممنوعہ فنڈنگ کیس کا فیصلہ گزشتہ 8 سال سے تاخیر کا شکار ہے۔ انہوں نے کہاکہ قومی سلامتی کو داؤ پر لگا کر ایک مجرم کو ناجائز چھوٹ دی جا رہی ہے،لاڈلے مجرم کو چھوٹ دینے کا خمیازہ پاکستان بھگت رہا ہے۔شازیہ مری نے کہاکہ شواہد کی روشنی میں ثابت ہو چکا ہے کہ عمران خان صادق اور امین نہیں ہیں۔ انہوں نے کہاکہ ایک طرف بیٹے سے تنخواہ نہ لینے پر ان کے والد کو نااہل قرار دیا گیا،عمران خان نے الیکشن میں سچ چھپایا اور لگاتار جھوٹ بولا مگر ان کے خلاف کارروائی نہیں ہوئی۔شازیہ مری نے کہاکہ قومی سلامتی، ملکی مفاد اور انصاف کا تقاضا ہے کہ پی ٹی آئی فارن فنڈنگ کا فیصلہ سنایا جائے۔ وفاقی وزیر نے کہاکہ پی ٹی آئی فارن فنڈنگ کیس میں مزید تاخیر قومی سلامتی کو داؤ پرلگانے کے مترادف ہے، تمام غیر قانونی فنڈنگ کی رقم بحق سرکار ضبط کی جائے۔ انہوں نے کہاکہ پی ٹی آئی کی فنانس کمیٹی نے ملازمین کے ذریعے ملک اور بیرون ملک چندا اکٹھا کیا، عمران خان اور عارف علوی کی ایما پر جرم کیا گیا،پی ٹی آئی شور مچا کر فارن فنڈنگ کا حساب دینے سے بچ نہیں۔
