حیدرآباد(آن لائن) حیدرآباد چیمبر آف کامرس اینڈ انڈسٹری کے صدر عدیل صدیقی نے وزیراعظم شہباز شریف پر زور دیا ہے کہ بلاتاخیر ملک میںمعاشی ایمرجنسی نافذ کی جائے، ملک کو درپیش زرمبادلہ کے بحران کا حل تلاش کرنے کے لیے تمام اسٹیک ہولڈرز سے مشاورت کی جائے۔

انہوں نے کہا کہ سری لنکا جیسے بحران کا پاکستان کو سامنا ہے اور اس حقیقت پر افسوس کا اظہار کیا کہ وفاقی حکومت نے ابھی تک اسٹیٹ بینک آف پاکستان (ایس بی پی) کا گورنر تعینات نہیں کیا۔جمعرات کو اپنے ایک بیان میں انہوں نے کہا کہ زرمبادلہ کی منڈی میں حالیہ گراوٹ موجودہ حکومت کا غیر سنجیدہ رویہ ظاہر کرتا ہے۔ انہوں نے کہا کہ تجارتی خسارہ 2021-22 میں 46 بلین ڈالر رہا جو کہ گزشتہ مالی سال 2020-21 میں ($30 بلین) سے 16 بلین ڈالر زیادہ تھا۔ انہوں نے کہا کہ ملائیشیا میں شرح سود کا بینچ مارک 2.25 فیصد، انڈونیشیا میں 3.5 فیصد، چین میں 3.7 فیصد، بنگلہ دیش میں 4.75 فیصد اور بھارت میں 4.9 فیصد ہے۔جبکہ پاکستان میں 15 فیصد ہے، انہوں نے کہا کہ اس طرح کی صورتحال نجی شعبے کے لیے مؤثر طریقے سے مقابلہ کرنا مشکل بنا دے گی۔ انہوں نے ریمارکس دیے کہ حکومت کو اس غیر یقینی صورتحال کو روکنے کے لیے تمام ذرائع جیسے بین الاقوامی مالیاتی فنڈ، ورلڈ بینک، ایشیائی ترقیاتی بینک وغیرہ کے ذریعے ڈالر کی متوقع آمد کا اعلان کرنا چاہیے۔انہوں نے کہا کہ کوئی بھی کاروباری ادارہ اتنی زیادہ مہنگائی کے دباؤ اور اتنی زیادہ شرح سود کے ساتھ قرضے واپس نہیں کر سکے گا۔ انہوں نے کہا کہ تیل کا لیٹر آف کریڈٹ (LC) اب ڈالر کی بلند شرح پر کھل رہا ہے جو ایک بڑا سوالیہ نشان ہے۔ انہوں نے کہا کہ اس سے ہر فرد کو پیشگی خبر دی گئی ہے کہ

ملک کو مستقبل میں پیٹرولیم کی شدید قلت کا سامنا کرنا پڑے گا۔ انہوں نے کہا کہ پاکستان تیزی سے سرمایہ کاروں کا اعتماد کھو رہا ہے کیونکہ پاکستان اسٹاک ایکسچینج (PSX) 40,000 کے نشان سے نیچے چلا گیا ہے۔وہ اس حقیقت پر فکر مند تھے کہ تیل اور گیس کے شعبے 1.6 ٹریلین روپے کے گردشی قرضے میں ڈوبے ہوئے ہیں جب کہ پاور سیکٹر کی سرکلر ڈیٹ 2.5 ٹریلین روپے ہے۔انہوں نے کہاکہ یہ ایک غلط یا مشکل وقت تھا کیونکہ روپے کی قدر میں اچانک اور غیر متناسب کمی واقع ہوئی اور یہ گردشی قرضوں کے چکر کو مزید متاثر کرنے والا تھا، ان کا کہنا تھا کہ توانائی کے شعبے کی جلد از جلد نجکاری کی ضرورت ہے۔