لاہور، اسلام آباد، کراچی (آن لائن، این این آئی)پاکستان مسلم لیگ (ن) کے مرکزی رہنما سینیٹر پرویز رشید نے ٹوئٹر پر اپنے بیان میں طنزیہ انداز میں کہا کہ ”انوکھا لاڈلا کھیلن کو مانگے فساد ”۔ ان کا کہنا تھا کہ عمران خان نے ایک طرح سے یہ کہا ہے کہ سپریم کورٹ مجھے فساد اور یلغار کا حق لے کر دے۔دوسری جانب پاکستان مسلم لیگ ن کی

رہنما اور وفاقی وزیر اطلاعات مریم اورنگزیب نے کہا ہے کہ ‘فال آف عمران اِن ڈی چوک’ہوچکا ہے، وہ ڈی چوک کے بھگوڑے ہیں۔سماجی رابطے کی سائٹ ٹوئٹر پر جاری اپنے بیان میں مریم اورنگزیب نے کہا کہ آئین شکن اور عدلیہ کی توہین کے مجرم سپریم کورٹ سے کس منہ سے اور کیا مانگ رہے ہیں؟ انہوں نے کہا کہ عدالتی کندھا استعمال کرنے کی مذموم سازش بھی فتنہ و فساد مارچ کی طرح ناکام ہوگی۔ دوسری جانب پاکستان پیپلز پارٹی کے رہنما سعید غنی نے کہا ہے کہ گرفتاری کے ڈر سے عمران خان فنی گالہ چھوڑ کر پشاور میں بیٹھے ہیں۔کراچی کے ایک ہوٹل میں تقریب میں میڈیا سے گفتگو کرتے ہوئے سعید غنی نے کہا کہ عمران خان کو آئین میں درج طریقہ کار کے تحت ہٹایا گیا، انہوں نے تحریک عدم اعتماد کے بعد منتیں کی تھیں۔انہوں نے کہا کہ اتحادیوں نے بھی خراب کارکردگی پر پاکستان تحریک انصاف (پی ٹی آئی)کا ساتھ چھوڑا۔انہوںنے کہا کہ پیٹرولیم قیمتوں میں اضافے سے مہنگائی کا بوجھ پڑھے گا لیکن ہمارے پاس کوئی راستہ نہیں تھا۔سعید غنی نے کہا کہ آئی ایم ایف سے معاہدہ عمران خان کر کے گئے تھے، پیٹرولیم لیوی ہر ماہ 4 روپے بڑھانے کا معاہدہ کیا گیا۔پیپلز پارٹی کے رہنما نے کہا کہ آئی ایم ایف کی بات مسترد کرتے تو کوئی ادارہ پاکستان کے ساتھ معاہدہ نہیں کرتا۔