ریاض(این این آئی)سعودی وزارت حج وعمرہ نے کہاہے کہ بیرون ملک سے سعودی عرب آنے والے زائرین کیلئے عمرہ سیزن 30 مئی 2022 کو ختم ہو گا۔میڈیارپورٹس کے مطابق سعودی وزارت
حج وعمرہ نے بتایاکہ عمرہ ویزہ درخواستوں کی وصولی کی آخری تاریخ 16 مئی ہے اس کے بعد عمرہ ویزے کیلئے درخواستیں قبول نہیں کی جائیں گی۔وزارت کا کہنا تھا کہ یکم ذوالقعدہ سے حج سیزن کا آغاز ہو جائیگا۔امسال عازمین حج کی مجموعی تعداد10 لاکھ مقررکی گئی ہے۔ 85 فیصدبیرون ملک ، باقی15فیصداندرون ملک کے عازمین ہوں گے۔امسال حج کوٹہ کے حساب سے سب سے زیادہ عازمین انڈونیشیا کے ہوں گے۔ انڈونیشیا سے آنے والے عازمین حج کی تعداد ایک لاکھ 51 ہزار ہوگی۔ دوسرا نمبر پاکستان کاہے جہاں سے81 ہزار 132 عازمین فریضہ حج اداکریں گے۔دو سال سے کورونا کی وجہ سے بیرون ملک سے عازمین کی آمد پر پابندی عائد تھی۔ کورونا وائرس پر کافی حد تک قابو پالیا گیا ہے۔کورونا ویکسی نیشن کا بڑا مرحلہ کامیابی سے مکمل ہو چکا ہے اور اب سعودی عرب سمیت دنیابھرمیں کورونا پابندیاں ختم کردی گئیں۔
