اسلام آباد (این این آئی)سابق وزیراعظم عمران خان کے ہیلی کاپٹر پر 98 کروڑ روپے خرچ ہوئے۔گزشتہ حکومت میں وزیراعظم آفس کے ہیلی کاپٹر پر کتنا خرچہ ہوا،تفصیلات جاری کر دی گئیں جس کے مطابق سفری اخراجات 47 کروڑ روپے اور زیر اشتعال ہیلی کی میٹننس پر 51 کروڑ روپے اخراجات آئے۔ حکومتی دستاویز کے مطابق سابق وزیراعظم کے ہیلی کاپٹر پر 98 کروڑ روپے خرچ ہوئے۔

دستاویزات کے مطابق عمران خان کے ہیلی کاپٹر پر اوسط یومیہ آٹھ لاکھ روپے سے زائد کا خرچہ آیا، ہیلی کاپٹر کا ایک گھنٹے کا استعمال دو لاکھ 75 ہزار میں پڑتا ہے، ٹوٹل 2 ہزار 726 گھٹنے ہیلی کاپٹر سفر پر رہا۔یاد رہے کہ فواد چوہدری نے سابق وزیراعظم کے ہیلی کاپٹر استعمال کرنے پر کہا تھا کہ ہیلی کاپٹر کا ایک کلو میٹر صرف 55 روپے میں پڑتا ہے، انہوں نے ہیلی کاپٹر کے سفر کو سستا قرار دیا تھا، جس پر سوشل میڈیا پر ان کا خوف مذاق اڑایا گیا تھا، دلچسپ ٹوئٹ کئے گئے، اس موقع پر مفتاح اسماعیل نے کہا تھا کہ فیملی کے لئے گاڑی لیں یا ہیلی کاپٹر۔ دوسری جانب پی ٹی آئی کے مرکزی سینئر نائب صدر فواد چوہدری نے کہا ہے کہ پوری چوں چوں مربہ حکومت ہیلی کاپٹر فوبیا کی مریض دکھائی دیتی ہے۔اپنے بیان میں فواد چوہدری نے کہاکہ اس حد تک بیوقوفی کا مظاہرہ دیکھنے میں آرہا ہے کہ پاگل پن کے مرض میں مبتلا ہونے کا گمان ہونے لگا ہے۔انہوں نے کہاکہ عقل کے اندھوں کو حساب کرنے کا شوق ہے مگر آتا نہیں، وزیراعظم کا اپنا ہیلی کاپٹر ہوتا ہے جس کے استعمال پر کم از کم اخراجات اٹھتے ہیں۔ انہوں نے کہاکہ کمرشل نرخوں کا ان ہاؤس فیسیلیٹی سے موازنہ مضحکہ خیز ہے، ہیلی کاپٹر کے فی گھنٹہ کمرشل اخراجات لگانا نری حماقت اور بیوقوفانہ حرکت ہے۔ وفاقی وزیر نے کہاکہ اپنی رسیدیں سارے ٹبر کو آج تک نہیں مل پا رہیں، عمران خان پر ڈائریاں لے جانے کے الزامات لگا رہے ہیں، بدعنوان اور بددیانت پہلے ہی سے تھے، اب ملت فروشی اور سازشی ہونے کی صفائی قوم کو دیں، نئے انتخابات کا اعلان کریں قوم خود حساب کرلے گی۔

موضوعات:حکومتی دستاویزات