اسلام آباد (مانیٹرنگ،این این آئی) وزارت داخلہ میں سندھ میں گورنر راج کے معاملے پر سمری کی تیاری شروع کر دی گئی ہے، جنگ نیوز نے ذرائع کے حوالے سے بتایا ہے کہ اہم اجلاس وزارت داخلہ میں طلب کر لیا گیاہے جس کی صدارت وفاقی وزیر داخلہ شیخ رشید کریں گے۔
اجلاس میں سندھ میں امن و امان کی صورتحال کا جائزہ لیا جائے گا، سندھ میں امن و امان کی خراب صورتحال کے تناظر میں سمری تیار کی جائے گی۔ذرائع کا کہنا ہے کہ وزاتِ داخلہ سندھ میں گورنر راج کی سمری وزیراعظم کو بھجوا سکتی ہے۔ واضح رہے کہ وفاقی وزیر داخلہ شیخ رشید احمد نے وزیر اعظم عمران خان کو تجویز دی ہے کہ سندھ میں گور نر راج لگا دیں۔میڈیا سے گفتگو کرتے ہوئے انہوں نے بتایاکہ انہوں نے وزیراعظم عمران خان کو تجویز دی ہے کہ وہ سندھ میں گورنر راج لگا دیں۔انہوں نے کہاکہ سندھ ہاؤس اسلام آباد میں کوئی کارروائی نہیں کی جارہی، جو لوگ وہاں گئے ہیں وہ جانیں اور ان کے حلقے کے لوگ جانیں تاہم یہ بات واضح ہوگئی ہے کہ سندھ کے لوگوں کا پیسہ وہاں استعمال کیا جارہا ہے۔شیخ رشید نے کہا کہ وہ عمران خان کو اپنے بات کہہ کر آچکے ہیں، انہوں نے مشورہ دیا ہے کہ سندھ میں گورنر راج لگا دیا جائے اب یہ وزیراعظم کا اختیار ہے کہ وہ کیا کرنا چاہتے ہیں۔انہوں نے کہا کہ سندھ ہاؤس ایکسپوز ہوگیا ہے، قوم عمران خان کے ساتھ کھڑی ہے، سندھ ہاؤس میں جو خرید وفروخت ہوئی سندھ میں گورنر راج نافذ کرنا چاہیے۔دوسری جانب پیپلز پارٹی کے مرکزی رہنما سندھ کے وزیر اطلاعات سعید غنی نے شیخ رشید کے مشورہ کو پاگل پن قرار دیدیا۔
