اسلام آباد (نیوز ڈیسک) امریکا نے ویزا پالیسی میں مزید سختی کرتے ہوئے سات مزید ممالک کو ان ریاستوں کی فہرست میں شامل کر لیا ہے، جن کے شہریوں کو ویزا درخواست کے وقت 5 ہزار سے 15 ہزار ڈالر تک بطور بانڈ جمع کرانا ہوگا۔ اس اضافے کے بعد ایسے ممالک کی مجموعی تعداد 13 ہو گئی ہے، جن میں بڑی تعداد افریقی ریاستوں کی ہے۔ایسوسی ایٹڈ پریس کی رپورٹ کے مطابق امریکی محکمہ خارجہ پہلے ہی گزشتہ برس موریطانیہ، ساؤ ٹومے و پرنسپے، تنزانیہ، گیمبیا، ملاوی اور زیمبیا جیسے ممالک کے لیے یہ شرط نافذ کر چکا تھا۔ اب جن نئے ممالک کو اس فہرست میں شامل کیا گیا ہے ان میں بھوٹان، بوٹسوانا، وسطی افریقی جمہوریہ، گنی، گنی بساؤ، نامیبیا اور ترکمانستان شامل ہیں۔
یہ نیا ضابطہ یکم جنوری سے نافذ العمل ہو چکا ہے۔امریکی حکام کا مؤقف ہے کہ بانڈ کی شرط کا مقصد یہ یقینی بنانا ہے کہ متعلقہ ممالک کے شہری ویزا کی معیاد ختم ہونے کے بعد امریکا میں غیر قانونی قیام نہ کریں۔ تاہم حکام نے واضح کیا ہے کہ بانڈ جمع کرانے سے ویزا کی منظوری کی ضمانت نہیں ملتی۔ اگر ویزا مسترد ہو جائے یا ویزا رکھنے والا تمام شرائط پر عمل کرے تو جمع کرائی گئی رقم واپس کر دی جاتی ہے۔یہ اقدام سابق صدر ڈونلڈ ٹرمپ کی انتظامیہ کی اس پالیسی کا تسلسل قرار دیا جا رہا ہے، جس کے تحت ویزا کے حصول کے عمل کو مزید سخت بنایا گیا۔ نئی شرائط میں ذاتی انٹرویو، سوشل میڈیا سرگرمیوں کی تفصیلات اور سابقہ سفر و رہائش کا مکمل ریکارڈ فراہم کرنا شامل ہے۔ماہرین کے مطابق اس فیصلے سے متعدد ممالک کے شہریوں کے لیے امریکی ویزا حاصل کرنا نہ صرف مشکل بلکہ زیادہ مہنگا بھی ہو جائے گا، جس کے نتیجے میں بین الاقوامی سفر، تعلیم اور تجارتی روابط متاثر ہونے کا خدشہ ہے۔
