کراچی (نیوزڈیسک)پاک بحریہ کے لئے مقامی طور پر تیار کئے جانے والے میزائل بردار جہاز کی بنیاد رکھنے کی تقریب آج کراچی شپ یارڈ میں منعقد ہوئی،وائس ایڈمرل ہشام بن صدیق ،وائس چیف آف نیول اسٹاف تقریب کے مہمان خصوصی تھے۔کمانڈر پاکستان فلیٹ وائس ایڈمرل زیڈ ایم عباسی اور کمانڈر کراچی وائس ایڈمرل عارف اللہ حسینی نے بھی تقریب میں شرکت کی۔ میزائل بردار جہاز جدید ڈیزائن اور تکنیک سے مزین میزائل سسٹم کا حامل کثیر المقاصد جہاز ہے جس میں ملکی ساختہ آلات حرب نصب ہیں۔اس جہاز کی لمبائی 63 میٹر اور چوڑائی 8.8 میٹر ہے جبکہ اس کی رفتار30 ناٹ اور رینج 1000 ناٹیکل میل ہے۔تقریب سے خطاب کرتے ہوئے مہمان خصوصی وائس ایڈمرل ہشام بن صدیق نے اس جہاز کی تعمیر کے اہم سنگ میل کی بر وقت تکمیل کو سراہا اور اس اعتماد کا اظہار کیا کہ پاک بحریہ اور کراچی شپ یارڈ مشترکہ طور پر مقامی سطح پرجہاز سازی میں خود انحصاری کا اہم ہدف حاصل کریں گے۔انہوں نے شپ یارڈ کی کارکردگی کو مزید سراہتے ہوئے کہا کہ کراچی شپ یارڈ نے جدید جہاز سازی کی ٹیکنالوجی میں مہارت کا چیلنج نہ صرف پورے اعتماد کے ساتھ قبول کیا ہے بلکہ مشینری،آلات اور مہارت میں بتدریج اضافہ کیا ہے۔حالیہ سالوں یں جہاز سازی کے تمام منصوبوں کی ماہرانہ اور بروقت تکمیل اس کی روشن مثال ہے۔اس سے قبل رئیر ایڈمرل سید ناصر حسن شاہ منیجنگ ڈائریکٹر کراچی شپ یارڈ نے اپنے استقبالیہ خطبے میں کہا کہ یہ میزائل بوٹ اس طرز کا تیسرا پراجیکٹ ہے جو کہ پاکستان کے قابل بھروسہ دوست چین کے تعاون سے تیار کیا جا رہا ہے۔انہوں نے شپ یارڈ میں جاری دیگر منصوبوں کا بھی ذکر کیا جن میں پاک بحریہ کے لئے تعمیر کئے جانےوالے 17000 ٹن فلیٹ ٹینکر اور2 لینڈنگ کرافٹس شامل ہیںاس کے علاوہ پاکستان آرمی اور پاکستان میری ٹائم سیکیورٹی ایجنسی کے لئے تعمیر کئے جانے جہاز بھی کراچی شپ یارڈ کے پراجیکٹس کا حصہ ہیں۔ایم ڈی شپ یارڈ نے وزارت برائے دفاعی پیداوار اور بالخصوص پاک بحریہ کے تعاون اور سرپرستی کا شکریہ ادا کیا اور یہ یقین دہانی کرائی کہ شپ یارڈ نے حالیہ سالوں میں جو ساکھ قائم کی ہے اس کو برقرار رکھتے ہوئے تمام منصوبے اعلیٰ معیار کے مطابق بر وقت پایہ تکمیل تک پہنچائیں گے۔تقریب میں چین،ترکی،پاک بحریہ،سرکاری اور نجی اداروں کے اعلیٰ حکام اور شپ یارڈ کے افسران شریک تھے۔