اسلام آباد ( آن لائن )مشیر قومی سلامتی معید یوسف نے کہا ہے کہ پاکستان افغانستان تک امداد پہنچانے کے لیے زمینی اور فضائی پل بننے کے لیے تیار ہے۔ امریکی خبر رساں ادارے کو دیئے گئے ایک انٹرویو میں مشیر قومی سلامتی نے کہا کہ افغانستان میں خوراک اور

ادویات کی شدید قلت ہے۔ افغانستان میں ضروریات زندگی حاصل کرنے کیلیے مائیں بچوں کو بیچنے پر مجبور ہیں۔انہوں نے کہا ہے کہ افغانستان کو امداد کیلئے پاکستان نے فضائی اور زمینی پل بننے کی پیشکش کی ہے۔افغانستان کو خوراک اور ادویات کی فراہمی کے لیے پاکستانی سرزمین استعمال کی جاسکتی ہے۔ وزیراعظم عمران خان نے افغانستان کے عوام کے لیے امدادی پیکج کا اعلان کیا ہے۔ دنیا کے تمام ممالک کو بھی 35 ملین افغان مرد، خواتین اور بچوں کا سوچنا چاہیے۔ان کا کہنا ہے کہ افغان عوام کی انسانی امداد سیاست سے بالاتر ہونی چاہیے۔ بین الاقوامی تنظیمیں افغانستان میں ہیلتھ ورکر زکی معاونت اور تنخواہیں فراہم کرنے کیلئے اقدامات کریں۔