لندن (نیوزڈیسک )برطانوی سائنس دان سٹیفن ہاکنگ اور ایپل کے شریک بانی سٹیووزنائیک سمیت دنیا کے اعلی ترین ٹیکنالوجی ماہرین نے قاتل روبوٹس کی تیاری کے خلاف سخت وارننگ جاری کی ہے۔تقریبا ایک ہزار ٹیکنالوجی سربراہان نے ایک کھلے خط میں کہا انسانی مداخلت کے بغیر اپنے اہداف کے چنا کے لئے مصنوعی ذہانت استعمال کرنے والے خود مختیار ہتھیار گن پاڈر اور ایٹمی ہتھیاروں کے بعد جنگ میں تیسرا بڑا انقلاب ہے۔ انہوں نے لکھا آج انسانیت کیلئے اہم سوال یہ ہے کہ آیا مصنوعی ذہانت پر مبنی ہتھیاروں کی عالمی دوڑ شروع کی جائے یا اسے شروع کرنے سے روکا جائے، خط میں مزید کہا گیا اگر فوجی طاقت رکھنے والے کسی ایک بڑے ملک نے مصنوعی ذہانت پر مبنی ہتھیاروں کی تیاری شروع کی اتو ان ہتھیاروں کی عالمی دوڑناگزیر ہاجائے گی۔ ان سائنسدانوں کے مطابق آرنلڈ شوزینگر کی مشہور زمانہ ٹرمینیٹر سے ملتے جلتے خود کار قاتل مشینوں کا آئیڈیا بڑی تیزی سے سائنس فکشن سے حقیقت میں بدلتا جارہا ہے۔ خط میں بتایا گیا کہ اس طرح کے نظام کی تیاری اب دہائیوں کی نہیں بلکہ سالوں کی بات رہ گئی ہے، سائنسدانوں نے ان خود مختار ہتھیاروں کے دہشت گردوں، آمروں، جنگی سرداروں کے ہاتھ لگنے کی صورت کو قیامت جیسا ماحول قرار دیا ہے۔ خط میں آکر میں کہا گیا کہ کئی طریقوں سے اس مصنوعی ذہانت کو جنگی میدانوں میں انسانوں بالخصوص معصوم شہریوں کو بچانے کیلئے استعمال کیا جاسکتا ہے۔