سرائے نورنگ(آن لائن)کوہاٹ میں قتل ہونیوالی میڈیکل کی طالبہ لکی مروت کی رہائشی عاصمہ رانی کے والد غلام دستگیر نے مبینہ ملزم مجاہد آفریدی کے لئے عام معافی کااعلان کیا۔تصیفہ(ننواتے)کی مرکزی تقریب سرائے نورنگ میں منعقد ہوئی۔ننواتے تقریب میں جے یوآئی لکی مروت
سے منتخب رکن قومی اسمبلی شیخ الحدیث مولانا محمد انور خان،اے این پی لکی مروت کے ضلعی صدر ملک علی سرورخان،جے یوآئی کے صوبائی شوریٰ کے رُکن مفتی ضیاء اللہ،مفتی عبدالغفار،قومی وطن پارٹی لکی مروت کے ضلعی صدر امیرزادہ خان سمیت علماء کرام اور عام شہریوں نے کثیر تعداد میں شرکت کی۔مبینہ ملزم مجاہد آفریدی کے خاندان کوہاٹ تبلیغی مرکز کے مشران جن میں مبینہ ملزم کے چچا نورخان،ملک سرباز،عنایت اللہ،تبلیغی مرکز کوہاٹ کے مشران صدرالدین،خانوالدین،ملک حسیب ایڈوکیٹ،مولاناشیرعلی ،مولاناعبدالغفار،طارق محمود اورنوابزہ شفیع اللہ خان شامل تھے،سمیت دیگر مشران کے ہمراہ سرائے نورنگ آکر مقتولہ عاصمہ رانی کے خاندان کو ننواتے کیا۔مقتولہ عاصمہ رانی کے والد غلام دستگیر نے ملزم مجاہد آفریدی کو اللہ کی رضا کی خاطر معاف کیا۔فریقین آپس میں بغل گیر ہوئے۔تقریب میں سیکرٹری کے فرائض ملک ہارون باچانصرخیل نے انجام دئیے۔ننواتے تقریب میں علماء کرام اور سیاسی ومذہبی
جماعتوں کے مقامی قائدین نے خطاب کرتے ہوئے مقتولہ عاصمہ رانی اوراُن کے مبینہ قاتل مجاہد آفریدی کے خاندانوں کے تصیفہ کو خوش آئند قرار دیااور کہاکہ اللہ پاک صلح پر خوش ہوتے ہیں، مقتولہ عاصمہ رانی کے والدنے اپنی صاحبزادی مقتولہ عاصمہ رانی کے مبینہ قاتل مجا ہد آفریدی کے لئے معافی کااعلان کرتے ہوئے کہاہے کہ عدالت کے ذریعے قاتل کو پھانسی کی سزاء تک پہنچایا اب اُنہوں نے علماء کرام اور مشران کے مشاورت سے مبینہ ملزم مجاہد آفریدی کو اللہ کی رضاء کے لئے معاف کردیا۔
