ابوظہبی (این این آئی)متحدہ عرب امارات (یو اے ای)کی ریاست دبئی کی معاشی امور سے متعلق عدالت دبئی انٹرنیشنل فنانشل سینٹر کورٹ نے بھارتی کاروباری شخصیت بی آر شیٹی کو 16 کروڑ 87 لاکھ درہم ادائیگی کا حکم دے دیا۔دبئی انٹرنیشنل فنانشل سینٹر کورٹ کے جسٹس اینڈریو موران نے کہا کہ بی آر شیٹی کی گواہی جھوٹ کا ناقابل یقین سلسلہ اور متضاد دعووں پر مشتمل تھی۔عدالت کے مطابق شیٹی نے 2018 میں 50 ملین ڈالرز کے قرض کے لیے ذاتی ضمانت پر حلف کے دوران جھوٹ بولا، عدالت نے بھارتی بزنس مین بی آر شیٹی کے خلاف شواہد کوناقابلِ تردید قرار دیتے ہوئے بینک آف انڈیا کو ڈی آئی ایف سی برانچ کو 16 کروڑ 87 لاکھ درہم ادائیگی کا حکم دیا ہے۔
عدالت نے تمام دستاویزی شواہد اور تصاویر کی روشنی میں فیصلہ سنایا، جس میں بی آر شیٹی کے دستخط کی تصدیق بھی شامل تھی۔عدالت نے قرض کی مکمل ادائیگی تک 9 فیصد سالانہ سود بھی عائد کیا جس کے مطابق بھارتی کاروباری شخصیت بی آر شیٹی کو روزانہ تقریبا 11 ہزار 341 ڈالرز سود ادا کرنا ہوگا۔بی آر شیٹی نے 1975 میں متحدہ عرب امارات میں ہیلتھ کیئر سسٹم قائم کیا تھا جو متحدہ عرب امارات کی سب سے بڑی پرائیویٹ ہیلتھ کیئر کمپنی بن گئی۔تاہم 2019 میں کمپنی کے 4.4 ارب ڈالرز کے غیر ظاہر شدہ قرض کے انکشاف کے بعد کمپنی دیوالیہ ہو گئی اور بی آر شیٹی نے عہدے سے استعفی دے کر بھارت فرار ہو گئے۔
