کراچی(این این آئی)سول ایوی ایشن اتھارٹی(سی اے اے)نے کابل ایئرپورٹ پر غیر یقینی صورت حال کے پیش نظر ملکی وغیرملکی پروازوں کے لیے ہدایت نامہ جاری کردیا۔سول ایوی ایشن اتھارٹی کے ہدایت نامہ میں کہا گیا ہے کہ کابل کی طرف سے پاکستانی فضائی حدود میں داخلے سے 15 منٹ پہلے کراچی، لاہور یا اسلام آباد ایریا کنٹرول سینٹر اپنے
روٹ کے مطابق فریکوینسی پر رابطہ کریں گے۔سی اے اے نوٹم کے مطابق کراچی، لاہور یا اسلام آباد سے کابل ائیراسپیس میں اپنے رسک پہ داخل ہونے والے جہازوں کو ائیر ٹریفک سروس ٹرانسفر آف کنٹرول پوائنٹ تک مہیا کی جائے گی۔نوٹم میں جاری ہدایات 21 اگست سے 30 اگست تک نافذالعمل رہیں گی۔دریں اثنا کسٹمز نے بیرونِ ملک سفر کرنے والے مسافروں کے لیے نیا ہدایت نامہ جاری کردیا۔تفصیلات کے مطابق کسٹم کی جانب سے پاکستان کے تمام ایئرپورٹس سے بیرونِ ملک جانے والے مسافروں کے لیے نئی ہدایات جاری کی گئیں ہیں، جن پر فوری عمل درآمد ہوگا۔کسٹم نے تمام بین الاقوامی مسافروں کو ہدایت کی ہے کہ وہ اپنی پرواز سے پہلے تمام قیمتی سامان ظاہر کرنے کے پابند ہوں گے، اسی طرح وطن واپس آنے والے مسافروں کو بھی کسٹمز حکام کے سامنے سامان ڈیکلیئر کرنے کے لیے فارم بھرنا ہوگا۔ہدایت نامے میں کہا گیا ہے کہ مسافروں کو قیمتی سامان، زیورات ،کرنسی قیمتی پتھر کی موجودگی کا ذکر بھی ایک فارم پر کرنا ہوگا، پابندی نہ کرنے والے مسافروں کو سامان لے جانے کی اجازت نہیں ہوگی۔کسٹمز حکام نے واضح کیا ہے کہ بین الاقوامی مسافر اپنا قیمتی سامان ہر صورت ڈیکلئیر کرنے کے پابند ہوں اور انہیں چیک کرانے کے بعد کانٹر پر فارم جمع کرانا ہوگا۔
