کراچی(این این آئی)پاکستان پیپلزپارٹی شہید بھٹوکی رہنمافاطمہ بھٹو ہالی ووڈ کی سپراسٹار اداکارہ انجلینا جولی کے خلاف بول پڑیں، اداکارہ کے افغانستان پر بولنے پر مقبوضہ کشمیر اور فلسطین یاد کرادیا۔واضح رہے کہ ہالی ووڈ اسٹار انجلینا جولی ایک پرائیویٹ پرسن ہیں
لیکن انہوں نے حال میں انسٹاگرام جوائن کیا جس میں وہ افغانستان میں بحران کا سامنا کرنے والے لوگوں کی آواز دنیا تک پہنچانے کا کام کر رہی ہیں۔تاہم فاطمہ بھٹو نے سماجی رابطے کی ویب سائٹ ٹوئٹر پرغیرملکی ستاروں کے اس رویے کوآڑے ہاتھوں لیا۔انہوں نے انجلینا جولی کی لگائی گئی خبر کو ری ٹوئٹ کیا اور کہا کہ کچھ معروف حقوق نسواں اور اداکارائوں کے مطابق، افغانستان پچھلے ہفتے تک جنت تھا۔دوسری ٹوئٹ میں فاطمہ نے انجلینا کو افغانستان پر بولنے پر شکریہ ادا کیا اور لکھا کہ اگلی بار فلسطین میں ہونے والے مظالم پر بھی آواز بلند کریں۔آخر میں فاطمہ نے ایک بار پھر بی بی سی کی تصویر کے ساتھ تمام صارفین سے سوال کیا، کہ کیا انجلینا کو کسی نے مقبوضہ کشمیرکے بارے میں آگاہ کیا ہے؟خیال رہے سوشل میڈیا سے دور رہنے والی ہالی ووڈ کی سپر اسٹار انجلینا جولی نے چند روز قبل باقاعدہ طور پر انسٹاگرام میں شمولیت اختیار کی۔ انجلینا جولی اپنے انسٹاگرام کو افغانستان میں بحران کا سامنا کرنے والے لوگوں کی آواز کو دنیا تک پہنچانے کے لیے استعمال کر رہی ہیں۔انجلینا جولی ہالی ووڈ کی سپر اسٹار ہونے کے ساتھ ساتھ اقوام متحدہ کی خصوصی سفیر بھی ہیں۔
