کراچی(این این آئی)افغانستان اتھارٹیز کی جانب سے مقامی لوگوں کا انخلا روکنے کے نئے احکامات سامنے آنے کی وجہ سے پاکستان انٹرنیشنل ایئر لائن نے پیرکوایک بار پھرکابل فلائٹ آپریشن ملتوی کر دیا ہے۔ ترجمان پی آئی اے عبداللہ ایچ خان کے مطابق پیرکو کابل کے لیے تینوں پروازیں منسوخ کر دی گئی ہیں۔ ایوی ایشن ذرائع کے مطابق افغان حکام کی جانب سے مقامی لوگوں کو کابل سے انخلا کی اجازت نہیں دی جا رہی ہے جس وجہ سے پہلے سے تیار فہرستوں کے مطابق مسافروں کی بورڈنگ میں دشواری کا خدشہ ہے۔ ترجمان کے مطابق پی آئی اے نے ایک دن کے لیے کابل کی تمام پروازیں منسوخ کردی ہیں،منگل کی کی پروازوں کے حوالے سے اعلان بعد میں کیا جائے گا۔ واضح رہے کہ پی آئی اے کی جانب سے گزشتہ روز کیے گئے اعلان کے مطابق پیرکو پی آئی اے فلائٹ آپریشن کے لیے 3 پروازیں کابل جانا تھیں، اس آپریشن کے لیے دو بوئنگ طیارے اور ایک ایئر بس تیار تھی۔