ؒلاہور(نیوزڈیسک)وفاقی وزیر ریلوے خواجہ سعد رفیق نے کہا ہے کہ پاکستان تحریک انصاف جوڈیشل کمیشن کے معاملہ پر مسلم لیگ(ن) کے ساتھ کیے گئے معاہدے سے پھر گئی ہے،پی ٹی آئی نے الزام تراشی کرنا تھی تو جوڈیشل کمیشن پر معاہدہ کیوں کیا۔انہوںنے کہا کہ پیپلز پارٹی کی شکست وریخت کی وجہ دھاندلی نہیںاس کی ناقص ترین کارکردگی ہے۔ شفاف حکمرانی اور موثر کارکردگی کبھی پیپلزپارٹی کا موضوع نہیں رہا۔ پی ٹی آئی ، پیپلزپارٹی کی مانند تباہی کے راستے پر چلنے سے گریز کرے۔ اپنے ایک بیان میں خواجہ سعد رفیق نے کہا کہ معاہدے میں طے تھا کہ منظم دھاندلی ثابت ہوئی تو ملک میں نئے انتخابات کروائیں گے ، بصورت دیگر پی ٹی آئی الزامات واپس لے گی۔پی ٹی آئی نے الزام تراشی کرنا تھی تو جوڈیشل کمیشن پر ہم سے معاہدہ کیوں کیا۔ عمران کی پریس کانفرنس ایک ناشُکرے ، بے اعتبارے اور ضدی شخص کی چیخیں تھی۔انہوںنے کہا کہ پی ٹی آئی گمراہی اور غیر یقینی پھیلا کر جمہوریت گرانے کی سازش میں ملوث تھی،عمران کے منہ سے نکلا ہوا ہر لفظ قانون بن سکتا ہے اور نہ حکم کا درجہ رکھتا ہے۔انہوںنے کہا کہ دوسروں سے معافیوں اور استعفوں کے مطالبے کرنے والا جھوٹ پکڑے جانے پر خود معافی مانگ کر استعفیٰ کیوں نہیں دیتا؟پی ٹی آئی گھسے پٹے الزامات کا بین کرنے کی بجائے تعمیری سیاست اور عوامی خدمت پر توجہ دے۔