کراچی (نیوزڈیسک) مسلم لیگ(ن ) نے جوڈیشل کمیشن کے فیصلے سے فائدہ اٹھانے کافیصلہ کرلیااوراس سلسلے میں حکمت عملی تیارکرلی گئی .وفاقی وزیر منصوبہ بندی احسن اقبال نے کہا ہے کہ مسلم لیگ ن جوڈیشل کمیشن کے فیصلے پر تکبر نہیں عاجزی کا اظہار کرتی ہے، اس موقع سے فائدہ اٹھا کر قوم کو یکجا کریں گے۔ تحریک انصاف کے رہنما جسٹس (ر) وجیہہ الدین احمد نے کہا کہ جوڈیشل کمیشن کے فیصلے سے جمہوریت مضبوط ہوئی ہے، کچھ چیزوں پر تحفظات ہیں جبکہ سینئر تجزیہ کار مجیب الرحمٰن شامی نے کہا کہ وزیراعظم نے خطاب میں اپنے مخالفین کو سیاسی چیلنج نہیں دیا۔ ایک نجی ٹی وی کے پروگرا م میں گفتگوکرتے ہوئے انہوں نے کہاکہ مسلم لیگ ن جوڈیشل کمیشن کے فیصلے پر تکبر نہیں عاجزی کا اظہار کرتی ہے، اس موقع سے فائدہ اٹھا کر قوم کو یکجا کرنے کی کوشش کریں گے، ہمیں سیاسی جماعتوں سے بالاتر ہو کر پاکستان کا پرچم بلند کرنا ہوگا، پچھلے دورِ حکومت میں میں نے پیپلز پارٹی کے ساتھ مل کر دھاندلی کی وجوہات ختم کرنے کی کوشش کی، تحریک انصاف کے انتظار میں انتخابی اصلاحات نہیں کیں، 2018ء کے انتخابات کو انتخابی اصلاحات کے ذریعے شفاف بنانا چاہتے ہیں۔ انہوں نے کہا کہ دھرنے کے پیچھے کون تھا یہ ایک اوپن سیکرٹ ہے، دھرنے کے پیچھے چند مخصوص لوگ تھے جو عمران خان کو اپنے مقاصد کیلئے استعمال کر کے چلے گئے، پاکستان میں عوام کا شعور اتنا پختہ ہوچکا ہے کہ کوئی سازش جمہوری نظام کو ڈی ریل نہیں کرسکتی، حکومت نے اس بحران کے دوران بالغ نظری کا مظاہرہ کیا ہے۔ احسن اقبال کا کہنا تھا کہ وزیراعظم اب پارلیمنٹ کو ڈبل لفٹ کروا ئیں گے۔ تحریک انصاف کے رہنما جسٹس (ر) وجیہہ الدین احمد نے پروگرام میں گفتگو کرتے ہوئے کہا کہ جوڈیشل کمیشن کے فیصلے سے جمہوریت مضبوط ہوئی ہے، رپورٹ دیکھنے کے بعد ہی فیصلے پر اپنی رائے دے سکوں گا، کچھ چیزوں پر تحفظات ہیں، پاکستان کے انتخابی ریکارڈ کے مطابق ووٹنگ ٹرن آؤٹ 55فیصد کے لگ بھگ ہوتا ہے، ایسی صورت میں لاکھوں کے حساب سے اضافی بیلٹ پیپر چھاپنے کی وجہ سامنے آنی چاہئے۔ سینئر تجزیہ کار مجیب الرحمن شامی کی گفتگو سینئر تجزیہ کار مجیب الرحمن شامی نے کہا کہ وزیراعظم نے خطاب میں اپنے مخالفین کو سیاسی چیلنج نہیں دیا، اگر نواز شریف کی یہ سنجیدگی برقرار رہتی ہے اور عمران خان بھی اپنے ابتدائی ردعمل پر قائم رہتے ہیں تو نئے سفر کے آغاز کی توقع کی جاسکتی ہے، اگر دونوں رہنماؤں کی گفتگو وقتی ثابت ہوئی اور دوبارہ محاذ آرائی شروع ہوگئی تو صورتحال مختلف ہوسکتی ہے۔ انہوں نے کہا کہ جوڈیشل کمیشن کے فیصلے سے تحریک انصاف کو صدمہ پہنچا ہے، بلدیاتی انتخابات میں بہتر کارکردگی دکھا کر تحریک انصاف اس صدمہ سے نکل سکتی ہے ، تحریک انصاف واحد اپوزیشن پارٹی کے طور پر ابھر رہی ہے، مسلم لیگ ن کی پالیسیوں سے نالاں لوگوں کی توقعات عمران خان سے جڑی رہیں گی