لاہور (نیوزڈیسک) سپر یم کورٹ نے حمزہ شوگر ملز کا 800 کنال سرکاری اراضی پر قبضہ غیر قانونی قرار دیتے ہوئے لاہور ہائیکورٹ کے فیصلے کے خلاف اپیل خارج کر دی ۔ گزشتہ ورز جسٹس میاں ثاقب نثار کی سربراہی میں تین رکنی بینچ نے سپریم کورٹ رجسٹری برانچ لاہور میں کیس کی سماعت کی ۔سیکرٹری کالونیز بھی عدالت میں موجود تھے۔حمزہ شوگر ملز نے اراضی بارے ہائیکورٹ کے فیصلے کو سپریم کو رٹ میں چیلنج کیا تھا۔ دوران سماعت حمزہ شوگر ملز کے وکیل کی جانب سے موقف اختیار کیا گیا کہ ملز انتظامیہ 1963ءسے اس بنجر زمین کو آباد کیا ہوا ہے اور اس پر ملز انتظامیہ کی کروڑوں روپے کی مشینری نصب ہے، ملز انتظامیہ ٹرائل کورٹ کے فیصلے کی روشنی میں محکمہ مال کو تحصیل خان پور میں موجود اراضی کے معاوضے کی رقم دینے کو تیار ہے۔ ایڈووکیٹ جنرل نے عدالت کو آگاہ کیا کہ محکمے اور ملز انتظامیہ کے درمیان اراضی کے قبضے یا لین دین کا کوئی مو ثرقانونی معاہدہ موجود نہیں ،انتظامیہ نے آج تک کوئی معاوضہ بھی ادا نہیں کیا اور مقدمہ بازی کر کے اپنے قبضے کو طویل کیا ہے۔عدالت نے دلائل سننے کے بعد حمزہ شوگر ملز کا سرکاری اراضی پر قبضہ غیرقانونی قرار دیتے ہوئے ملز انتظامیہ کی لاہور ہائیکورٹ کے فیصلے کیخلاف اپیل مسترد کر دی۔ سپریم کورٹ نے حمزہ شوگر ملز کی اراضی سے متعلق دیگر درخواستیں بھی خارج کردیں ۔