اسلام آباد (این این آئی)وفاقی وزیر اطلاعات و نشریات فواد چوہدری نے کہا ہے کہ سابق صدر آصف علی زرداری سے متعلق جعلی اکاؤنٹس کیس میں اب تک 33 ارب روپے وصول ہو چکے ہیں۔سوشل میڈیا پر جاری اپنے ایک بیان میں وفاقی وزیر نے کہاکہ آصف زرداری جعلی اکاؤنٹس کیس میں قومی احتساب بیورو (نیب) اب تک 33 ارب روپے

وصول کر چکا ہے۔وفاقی وزیر نے بتایا کہ وصول کی گئی رقم تقریباً 20کروڑ ڈالر بنتی ہے تاہم اصل مقدمہ 5000 ارب روپے کے لگ بھگ ہے۔فواد چوہدری نے کہاکہ وصولی سے اندازہ لگالیں کہ ملک میں کرپشن کی کیا سطح رہی ہے اور حکمرانوں نے سندھ اور پاکستان کو کیسے لوٹا ہے۔ دوسری جانب صوبائی وزیر ٹرانسپورٹ اویس قادر شاہ نے وفاق سے بجلی کی قیمتوں میں اضافہ واپس لینے کا مطالبہ کرتے ہوئے کہا ہے کہ گھریلو صارفین کیلئے فی یونٹ بجلی 8 پیسے اور کمرشل صارفین کیلئے11 پیسے مہنگی کرنے کا فیصلہ واپس لیا جائے۔صوبائی وزیر نے مزید کہا کہ ملک میں نہ بجلی ہے نہ گیس اور نہ ہی زرعی زمینوں کے لیے پانی ہے، پھر یہ قیمتوں میں اضافہ کیوں کیا جارہا ہے، عمران نیازی صاحب نے عوام کو کسی قسم کا ریلیف نہ دینے میں کوئی کسر نہیں چھوڑی ہے، تین سالوں میں آپ نے ریلیف دینے کے بجائے عوام کی جیبوں پر ڈاکا ہی ڈالا ہے۔ اویس قادر شاہ نے کہا کہ سلیکٹڈ خان بجلی مہنگی ہونے پر کنٹینر پر چڑھ کرکہتے تھے کہ سارا پاکستان بند کرونگا، سچ کہتے تھے سلیکٹڈ خان نے کہ سارا پاکستان بند کروںگا اور آج وہی ہو رہا ہے، ملکی معیشت تباہ ہوتی جارہی ہے، یہ سلیکٹڈ کی پہلی اور آخری حکومت ہے اب کبھی ان نالائقوں کو اقتدار نہیں ملے گا۔