اسلام آباد (مانیٹرنگ ڈیسک/این این آئی)خیبر پختون خوا کے ضلع صوابی میں ایک ماں کو اس کے بدبخت 14 سالہ بیٹے نے عدالت کے باہر فائرنگ کر کے قتل کر دیا۔ اطلاعات کے مطابق نوجوان لڑکے نے غیرت کے نام پر اپنی والدہ کا قتل کیا۔رپورٹس میں بتایا گیا ہے کہ اس خاتون کے شوہر زبیر نے 25 مئی 2021 کو اس کے خلاف ضلع صوابی کے پرمولی پولیس اسٹیشن میں ایف آئی آر درج کروائی تھی۔
اس شخص نے دعویٰ کیا تھا کہ اس کی بیوی اس کے دوست شاد علی کے ساتھ بھاگ گئی ہے۔ معاملے کی چھان بین کے بعد پولیس نے جوڑے کو گرفتار کرلیا۔ خاتون نشاط بی بی کو ایک شیلٹر ہاؤس منتقل کیا گیا جبکہ شاد علی کو جیل بھیج دیا گیا۔ مقدمہ ہیڈ کانسٹیبل حضرت بلال نے درج کیا تھا۔ ہیڈ کانسٹیبل نے میڈیا سے بات کرتے ہوئے کہاکہ زبیر کی اہلیہ جو کہ نارانجی گاؤں کی رہائشی ہیں انہیں کیس کی سماعت کیلئے عدالت لایا گیا تھا جہاں جوڈیشل مجسٹریٹ صوابی نے ان کی ضمانت منظور کر لی تھی۔ ضمانت کے بعد، وہ ایک خاتون کانسٹیبل کے ساتھ صحن میں بیٹھی دستاویزات کا انتظار کر رہی تھی، اسی وقت یہ واقعہ پیش آیا۔ ہیڈکانسٹیبل کا مزید کہنا تھا کہ اس کا نوجوان بیٹا قریب آیا اور اس نے اپنی والدہ پر فائرکھول دیا جو کہ موقع پر جاں بحق ہو گئی۔ نوجوان نے اپنی والدہ کو مارنے کے بعد وہاں سے فرار ہونے کی کوشش کی لیکن پولیس نے اسے پکڑ لیا۔ رپورٹس میں بتایا گیا ہے کہ 42 سالہ خاتون پانچ لڑکوں اور تین لڑکیوں کی ماں تھی۔میڈیا رپورٹس میں مزید انکشاف سامنے آئے ہیں کہ والد نے چھوٹے لڑکے کو غیرت کے نام پر اپنی ماں کو مارنے کی ترغیب دی تھی۔ دوسری جانب ضلع صوابی میں دو اور نوجوانوں نے خود کشی کرلی۔ایک جاں بحق جب کہ دوسرا زخمی ہو گیا تفصیلات کے مطابق پیر کے روز موضع مرغز میں ایک نوجوان محنت کش یاسین زمان نے نامعلوم وجوہات کی بناء پر گندم میں استعمال ہونے والی زہریل گولی کھا کر اپنی زندگی کا خاتمہ کر لیا۔ دریں اثناء موضع ٹوپی میں عزیز اللہ نے نامعلوم وجوہات کی بناء پر اپنے آپ پر فائرنگ کر کے خود کو زخمی کر دیا یاد رہے کہ ضلع صوابی میں آئے روز خود کشی کی وارداتوں میں اضافہ ہو تا جارہا ہے پولیس نے الگ الگ ایف آئی آر درج کر کے تفتیش شروع کر دی ہے۔بنوں پولیس نے ایک کارروائی کے دوران موٹر کار اور اسلحہ برآمد کرکے
دو ملزمان گرفتارکر لئے جو سابقہ ریکارڈ یافتہ بتائے جاتے ہیں۔ڈسٹرکٹ پولیس آفیسر عمران شاہد نے بنوں پریس کلب میں بریفنگ کے دوران بتایا کہ رواں ماہ 25 تاریخ کو بخت نثار ولد دراز خان سکنہ امین مغل خیل نے مقامی پولیس تھانہ غوریوالہ کو رپورٹ کی کہ کالے رنگ کی موٹر کار فلڈر مقامی ملزمان وجاہت اللہ اور عبدالقدیر چھین کر لے گئے ہیں،مدعی کی رپورٹ پر ملزمان کے خلاف تھانہ غوریوالہ میں مقدمہ درج رجسٹر کیا گیا اور ڈی ایس پی رورل II رضوان خان اور ایس ایچ او تھانہ غوریوالہ ساجد خان کو
ملزمان کو فوری گرفتار کرنے اور سرقہ شدہ موٹر کار کی برآمد گی کا ٹاسک سونپاجنہوں نے ملزمان کو اپنی پیشہ وارانہ مہارت سے گرفتار کیا اور سرقہ شدہ موٹر کار فیلڈر بھی برآمد کی،جبکہ ملزم وجاہت اللہ کے قبضے سے ایک عدد کلاشنکوف معہ ایمونیشن بھی برآمد کی،واضح رہے کہ ملزم وجاہت اللہ سے تھانہ ہوید پولیس نے پہلے بھی موٹر کار برآمد کرکے مقدمہ درج رجسٹر کیا تھا گرفتار شدہ چور
اس نوعیت کے دیگر جرائم کے وارداتوں میں ملوث ہیں، تھانہ غوریوالہ میں چوری کے واردات میں باضابطہ طور پر نامزد ہوئے ہیں، ملزمان سے مزید تفتیش جاری ہے اور اہم انکشافات متوقع ہیں،ڈی پی او بنوں نے وضاحت کرتے ہوئے کہا کہ ملزم وجاہت اللہ موٹر کار، موٹر سائیکل اور دیگر گاڑیان کا عادی چور ہے، گاڑیاں چوری کرکے دیگر اضلاع میں سستے داموں فروخت کرنا اس کا پیشہ ہے۔
