اسلام آباد (این این آئی)اوگرا کی طرف سے 16 جون سے پٹرولیم مصنوعات کی قیمتوں میں ردوبدل کی سمری تیار کرلی گئی،ْ پٹرولیم مصنوعات مہنگی ہونے کا امکان ہے،اوگرا نے سمری پٹرولیم ڈویژن کو بھیج دی، پٹرول 4روپے 20پیسے مہنگا کرنے کی تجویز دی گئی، ڈیزل کی فی لیٹر قیمت 3روپے پچاس پیسے مہنگی کرنے
کی تجویز دی گئی،پٹرول اور ڈیزل کی قیمتوں کا تعین موجودہ لیوی پر کیا گیا،اس وقت پٹرول پر فی لیٹر لیوی 4روپے 80پیسے ہے،ڈیزل پر فی لیٹر لیوی 5روہے 14پیسے ہے،پٹرولیم مصنوعات کا حتمی فیصلہ وزارت خزانہ وزیر اعظم کی مشاورت سے کرے گی۔ دوسری جانب تاجر رہنما،آئرن و سٹیل مارکیٹس لاہور کے صدرراجہ عدیل نے عالمی سطح پر تیل کی قیمتوں میں کمی کے بعد پٹرولیم لیوی میں مشروط اضافہ کو منی بجٹ قرار دیتے ہوئے کہا ہے کہ پٹرولیم لیوی میں اضافہ پر پٹرولیم مصنوعات پر دیگر تمام ٹیکسز کا خاتمہ کرکے عوام کو ریلیف دیا جائے کیونکہ پٹرولیم لیوی میں اضافہ سے پٹرول کی قیمتیں بڑھیں گی اور ٹرانسپورٹیشن اخراجات بڑھنے سے اس کا صنعتی شعبہ پر بوجھ پڑے گا۔ان خیالات کا انہوں نے آئرن و سٹیل مارکیٹ لاہور کے صنعتکاروں کے وفد سے گفتگو کرتے ہوئے کیا۔راجہ عدیل اشفاق نے کہا کہ مہنگائی کو کنٹرول کرنے کیلئے ٹھوس اقدامات اٹھانے چاہیے تھے۔ پٹرولیم لیوی سے پٹرولیم مصنوعات میں اضافہ کے بعد فیول ایڈجسٹمنٹ کی مد میں بجلی کی قیمتوں میں بھی اضافہ ہوتا رہے گا جس کا بوجھ عوام و انڈسٹریز پر پڑے گا۔انہوں نے کہا کہ کہ بجلی مہنگی ہونی سے صنعتی شعبہ کی پیداواری لاگت میں اضافہ سے اشیاء مہنگی ہونے کے باعث مہنگائی میں مزید اضافہ ہوگا۔ انہوں نے کہاکہ مہنگائی میں کمی اورصنعتی شعبہ کی پیداواری لاگت میں کمی کیلئے بجلی، گیس اور پٹرولیم مصنوعات کی قیمتوں میں کمی لائی جائے اور فیول ایڈجسٹمنٹ کی مد میں ہر ماہ بجلی مہنگی کرنے کا سلسلہ بند کیا جائے۔
