اسلام آباد (این این آئی)آمدن چھپانے یا ٹیکس چوری کرنے والوں کیخلاف سخت قانونی مسودہ تیار کرلیا گیا،ٹیکس چور کو گرفتار کرکے قانونی کاروائی کی جاسکے گی،فنانس بل 2021-22 میں نئی شق شامل کر دی گئی،ایف بی آر کے اسسٹنٹ کمیشنر ان لینڈ ریونیو یا مساوی افسر کو گرفتاری کا اختیار ہوگا،سیکشن 203 اے کے تحت

دستاویزی ثبوت کی بنیاد پر ٹیکس نادہندہ گرفتار ہوگا،کسی شخص کی گرفتاری سے پہلے بورڈ سے اجازت لینا ہوگی،ٹیکس چوری پر مطلوبہ ٹیکس، جرمانہ یا سرچارج بھی دینا ہوگا،کسی کمپنی کی صورت میں ہر ڈائریکٹر یا افسر کی گرفتاری ممکن ہو سکے گی۔دوسری جانب پاکستان پیپلزپارٹی نے پٹرول کی قیمتوں میں اضافے کی کوششوں پر تشویش کا اظہار کرتے ہوئے کہاہے کہ اشرافیہ نمائندہ حکمرانوں کے بجٹ میں سرمایہ دار طبقے کو مراعات اور رعایات دی گئی ہیں۔ اپنے بیان میں نیئر حسین بخاری نے کہاکہ آئی ایم ایف شرائط نہ ماننے کے دعویداروں نے 496 ارب روپے قرض کے امیدوار بھی ہیں۔ انہوں نے کہاکہ مہنگائی آسمان کو چھو رہی ہے اور تنخواہ داروں کو سسکنے کیلئے بییارو مددگار چھوڑ دیا گیا ہے،عوام دشمن بجٹ کے بعد پٹرول بم گرانے کی تیاریاں تشویشناک اور قابل مذمت عمل ہے۔ انہوں نے کہاکہ عوام دشمن حکومت کو عوام کے اوپر پٹرول بم گرانے کی کسی صورت اجازت نہیں دیں گے۔ انہوں نے کہاکہ پٹرول کی قیمتوں میں اضافے کا برائے راست اثر غریب طبقے پر پڑتا ہے،پٹرول کی قیمتوں میں اضافہ ہوا تو مہنگائی میں تشویشناک حد تک اضافہ ہوگا۔ انہوں نے کہاکہ مسلسل عوام دشمن فیصلوں سے شدید ردعمل سامنے آ سکتا ہے، حکومت اپنی جیبیں اور مافیا کو فائدہ پہنچانے کے لئے عوام دشمن اقدامات سے گریز کرے۔ انہوں نے کہاکہ پیپلزپارٹی سلیکٹڈ حکومت کے ان اقدامات پر پارلیمان کے اندر اور باہر بھرپور آواز اٹھائے گی،مزدور تاجر کسان کاشتکار تنظیموں کے احتجاج میں پیپلز پارٹی بھرپور شرکت کرے گی۔