اسلام آباد (اے پی پی)وزیراعظم عمران خان نے قومی سلامتی کو درپیش چیلنجز کے خلاف انٹر سروسز انٹیلی جنس (آئی ایس آئی) کی پیشہ وارانہ صلاحیتوں کو سراہا ہے۔ انہوں نے یہ بات پیر کو آئی ایس آئی سیکرٹریٹ کے دورہ کے موقع پر کہی۔
وزیراعظم نے وزیر خارجہ شاہ محمود قریشی، وزیر دفاع پرویز خٹک، وزیر اطلاعات و نشریات فواد احمد چوہدری، وزیر داخلہ شیخ رشید احمد، چیئرمین جوائنٹ چیفس آف سٹاف کمیٹی جنرل ندیم رضا، چیف آف آرمی سٹاف جنرل قمر جاوید باجوہ، چیف آف نیول سٹاف ایڈمرل محمد امجد خان نیازی اور چیف آف ایئر سٹاف ایئر چیف مارشل ظہیر احمد بابر کے ہمراہ آئی ایس آئی سیکرٹریٹ کا دورہ کیا۔ یہاں جاری پریس ریلیز کے مطابق ڈی جی آئی ایس آئی لیفٹیننٹ جنرل فیض حمید نے شرکاء کا استقبال کیا۔ اجلاس میں اعلیٰ قومی اور عسکری قیادت کو علاقائی اور ملکی سلامتی کی صورتحال پر بریفنگ دی گئی۔ وزیراعظم نے قومی سلامتی کو درپیش چیلنجز کے خلاف انٹر سروسز انٹیلی جنس (آئی ایس آئی) کی پیشہ وارانہ صلاحیتوں کو سراہا اور پیشہ وارانہ تیاریوں پر اطمینان کا اظہار کیا۔
