ممبئی (نیوز ڈیسک) بالی ووڈ اداکار ، پروڈیوسر و کوریوگرافر ریمو ڈی سوزا ان دنوں اپنی دریافت شدہ اداکارہ لورین گوٹلیب کی زلفوں کے اسیر دکھائی دے رہے ہیں۔ لورین ہر جگہ ریمو کے ساتھ ساتھ دیکھی جارہی ہیں اور میڈیا کے سامنے ریمو کی تعریفیں کرتے نہیں تھک رہی ہیں جس سے نہ صرف بالی ووڈ اور میڈیا بلکہ خود ریمو کی اہلیہ بھی شک میں پڑچکی ہیں۔ لورین کو ریمو نے امریکن ڈانس ریئلٹی شو کے ذریعے دریافت کیا اور انہیں ریمو ڈی سوزاز اے بی سی ڈی میں کاسٹ کیا۔اس فلم نے تو زیادہ بزنس نہ کیا تاہم لورین کی قسمت خوب چمکی۔ اب لورین تو یہی کہتی ہیں کہ چونکہ ریمو جی نے انہیں انڈسٹری میں متعارف کروایا تھا، اس لئے وہ ہرجگہ انکی حمایت کرتی ہیں تاہم لورین شائد یہ بھول گئی ہیں کہ ریمو شادی شدہ اور دو بچوں کے باپ بھی ہیں۔ ایسے میں ان کی ضرورت سے زیادہ تعریف دال میں کچھ کالا ہونے کی نشانی ہے۔بالی ووڈ لائف ڈاٹ کام نے اس جوڑی کا نام لینے سے گریز کیا ہے تاہم کہا ہے کہ انڈسٹری میں اس وقت یہی سوال گردش کررہا ہے کہ کیا اس نئی پریم کہانی کا کردار اپنی نو دریافت شدہ محبت کی خاطر برسوں کی محنت سے بنائے ہوئے آشیانے کو اجاڑ دے گا۔