راولپنڈی(آن لائن)شمالی وزیرستان میں سیکورٹی فورسز کے دہشتگردوں کیخلاف آپریشن کے دوران پاک فوج کے کپتان اور دو جوانوں سمیت تین اہلکار شہید ہوگئے جبکہ دو دہشتگردوں کو ہلاک کردیاگیا۔آئی ایس پی آر کے مطابق سیکورٹی فورسز نے دہشتگردوں کی موجودگی کے

حوالے سے انٹیلی جنس معلومات کی بنیاد پر شمالی وزیرستان کے علاقے ڈوسالی میں آپریشن کیا،جس کے دوران دو دہشتگردوں کو ہلاک کردیاگیا۔فائرنگ کے تبادلے میں پاک فوج کے آفیسر کیپٹن فہیم اور دو جوان سپاہی شفیع اور سپاہی نسیم جام شہادت نوش کرگئے‎خیال رہے کہ اس سے قبل سیکیورٹی فورسز نے شمالی وزیرستان میں آپریشن کیا تھا جس کے دوران ہونے والے فائرنگ کے تبادلے میں ایک دہشت گرد مارا گیا تھا۔آئی ایس پی آر کے مطابق فائرنگ کے تبادلے میں دہشت گرد زاہد الدین مارا گیا تھا۔ شمالی وزیرستان کا رہائشی زاہد الدین ٹی ٹی پی کا سرگرم رکن تھا۔آئی ایس پی آر کے مطابق آپریشن کے دوران مارا جانے والا دہشت گرد زاہد الدین ٹارگٹ کلنگ، فورسز پر حملوں اور بھتہ خوری میں ملوث تھا۔