لاہور (آن لائن)نائب امیر مرکزی جمعیت اہل حدیث ڈاکٹر عبدالغفور راشدنے وزیر خزانہ حفیظ شیخ کے استعفے پر حیرت کا اظہار کرتے ہوئے مطالبہ کیا ہے کہ عمران خان کو ناکامیاں تسلیم کرکے استعفیٰ دینا چاہیے۔ مہنگائی بیروزگاری کے اصل ذمہ دار تو سلیکٹیڈ وزیراعظم ہیں۔ استعفیٰ تو انہیں دینا چاہیے۔ عمران خان نے ملک آئی ایم

ایف کے پاس گروی رکھ دیا ہے۔ حکومت کے پاس ڈوبتی معیشت کو سنبھالا دینے کے لیے کوئی پروگرام ہے اور نہ ہی کوئی سیاسی ویڑن۔میڈیا پر جھوٹ بولنے کے ماہر سرکاری ترجمانوں کے سہارے حکومت کو چلایا اور عوام کو بیوقوف بنایا جا رہا ہے۔وزیر اعظم نے تین سالوں میں سوا ئے سبز باغ دکھانے کے کچھ نہیں کیا، ان سے اگلے دوسال میں بھی کچھ نہیں ہوسکے گا۔ این آر او نہیں دوں گا، مستقبل کے جھوٹے وعدوں اوردعووں پر اب تک حکومت کو چلایا جارہا ہے مگر عملی کارکردگی صفر ہے۔ سٹیٹ بینک آرڈیننس پارلیمنٹ کی توہین اور قومی بینک آئی ایم ایف کے حوالے کرنے کی سازش ہے۔یہ ملکی سلامتی اورمالی خود مختاری کا معاملہ ہے۔ سیاسی جماعتوں کو خود مختاری کے تحفظ کے لئے جدوجہد کرنی چاہیے ورنہ آئندہ نسلیں برباد ہو جائیں گے۔اور ہمیں معاف نہیں کریں گی۔ ان کا کہنا تھا کہ اگرچہ ملک کو بیرونی قرضوں کے بوجھ تلے دینے کی سابقہ حکومتیں بھی ذمہ دارہیں مگر جو بربادی پی ٹی آئی حکومت نے کی ہے ،اس کی تاریخ میں مثال نہیں ملتی۔عوام اپنی روزمرہ ضروریات پوری کرنے کے قابل بھی نہیں رہے۔بجلی مہنگی کرکے ندیم بابر نے اپنی دیہاڑیاں لگالی ہیں۔ چینی مہنگی کر کے جہانگیر ترین اپنی سرمایہ کاری سے کئی گنا زیادہ وصول کرچکے ہیں۔ مگر ابھی تک کسی کے خلاف کوئی کارروائی نہیں کی گئی۔جہانگیر ترین کو ابھی تک نیب طلب کیا گیا اور نہ ہی گرفتاری عمل میں لائی گئی، جبکہ اپوزیشن قیادت عدالتوں میں پیشیاں بھگت رہی ہے۔

موضوعات:عمران خان