لاہور( نیوزڈیسک)سیکورٹیز اینڈ ایکس چینج کمیشن آف پاکستان نے متعلقہ انضباطی قوانین پر عملدرآمد نہ کرنے کے پیش نظر 23انٹرنیشنل این جی اوز کی رجسٹریشن منسوخ کرنے کا عمل شروع کر دیا ۔ایس ای سی پی کے مطابق یہ این جی اوز متعدد بار انتباہ کے باوجود اپنے سالانہ آڈٹ شدہ گوشوارے جمع کروانے میں ناکام رہیں۔ ایس ای سی پی نے مقامی این جی اوز کی سرگرمیوں اور گوشواروں کی جانچ پڑتال کے بعد انٹرنیشنل این جی اوز کے گوشواروں کی چھان بین کا عمل شروع کر دیا ہے۔اس سلسلے میں پہلے مرحلے میں تمام ایسی انٹرنیشنل این جی اوز کو نوٹس جاری کیے گئے جو کہ اپنے سالانہ گوشوارے اور اکاﺅنٹ جمع نہیں کروا رہی تھیں۔ این جی اوز کی جانب سے نوٹس کے جوابات اور ایس ای سی پی کے ریکارڈ کا جائزہ لینے کے بعد قانون کے مطابق تعمیل نہ کرنے والی این جی اوز کے خلاف کارروائی کا آغاز کر دیا ہے۔