اسلام آباد ( آن لائن)یوم پاکستان کے حوالے سے افواج پاکستان کی مشترکہ پریڈ جمعرات کے روز شکر پڑیاں کے پریڈ گرائونڈ میں ہوئی جس کے مہمان خصوصی صدر مملکت عارف علوی تھے جبکہ وزیر دفاع پرویز خٹک، چیئرمین سینیٹ صادق سنجرانی ،سپیکر قومی اسمبلی اسد قیصر ،وفاقی وزراء ،اراکین پارلیمنٹ ،سفارت کاروں اور شہریوں
کی بڑی تعداد نے شرکت کی ۔بریگیڈئر اظہر یاسین مشترکہ پریڈ کے پریڈ کمانڈر تھے ۔وزیر اعظم عمران خان کورونا ٹیسٹ مثبت آنے کی وجہ سے اس پریڈ میں شرکت نہیں کر سکے ۔صدر عارف علوی کی آمد کا اعلان بگل بجا کر کیا گیا وہ مخصوص صدارتی بگھی میں پریڈ گرائونڈ میں آئے تو انہیں پریڈ کمانڈر کی طرف سے قومی سلام پیش کیا گیا جس کے بعد قومی ترانہ ہوا ۔تلاوت کلام پاک سے پریڈ کا آغاز ہوا ۔صدر عارف علوی نے بعد ازاں پریڈ کا معائنہ کیا اور اسلامی لی ۔پاک فضائیہ کے سربراہ ائیر چیف مارشل ظہیر احمد بابر نے فلائی پاسٹ کی قیادت کرتے ہوئے ایف 16 بلاک 52 کا جدید ترین لڑاکا طیارہ اڑایا۔اس فلائی پاسٹ میں پاک بحریہ کے جہازوں سمیت جے ایف 17 تھنڈر،میراج طیاروں ،ایف سیون ٹی جی ،ایف سیون پی ،اواکس طیاروں، پی تھری سی اورین ،ای ٹی آرز طیاروں نے بھی حصہ لیا اس کے بعد مختلف یونٹس اور فورسز کے دستے مارچ پاسٹ کرتے ہوئے پریڈ کے چبوترے کے سامنے سے گزرے اور صدر
مملکت کو سلامی دی اس موقع پر پاکستان کی جدید دفاعی اور فوجی سازوسامان کا بھی مظاہرہ کیا گیا ۔برادر اسلامی ملک ترکی کے لڑاکا جہاز سولو ترک نے خوبصورت فضائی کرتبوں کا مظاہرہ کیا جسے عوام نے بے حد پسند کیا ۔چاروں صوبوں ،گلگت بلتستان ،آزاد کشمیر کے
فلوٹس بھی مارچ پاسٹ کرتے ہوئے سلامی کے چبوترے کے سامنے سے گزرے اس فلوٹس پر پاکستان کی ثقافت کے رنگ بھی نمایاں تھے اور فنکار اپنی فن کا مظاہرہ بھی کررہے تھے ۔وزارت سائنس و ٹیکنالوجی اور افواج پاکستان کے شعبہ تعلقات عامہ کا فلوٹس بھی لوگوں کی توجہ
کا مرکز بنے رہے۔پریڈ کے آخر میں پیراٹروپرز نے اپنی صلاحیتوں اور فری فال چمپنگ کا خوبصورت مظاہرہ کیا جس کی قیادت سپیشل سروسز گروپ کے جی او سی میجر جنرل ممتازاحمد نے کی ۔اس مظاہرے میں بحرین ،سری لنکا،ترکی ،فلسطین کے کے پیراٹروپرز نے بھی حصہ لیا اور صدر مملکت کو اپنے اپنے ممالک کے پرچم بھی پیش کئے ۔صدر نے تینوں سروسز چیفس کے ساتھ ان پیراٹروپرز سے ملاقات کی اور ان کی پیشہ وارانہ صلاحیتوں اورشاندار کرتبوں کو سراہا اور انہیں داد بھی دی۔
