کراچی (نیوزڈیسک) گورنر سندھ ڈاکٹر عشرت العبادخان نے کہا ہے کہ ترقی یافتہ معاشرے میں انسانیت کا بے حد احترام کیا جاتا ہے خاص طور پر وہاں معذور ، غریب اور نادار افراد اکو ایک خصوصی عزت اور مقام حاصل ہے پاکستان میں بھی اسپیشل بچوں کے ادارے معذور ی کی بڑھتی ہوئی شرح پر قابو پانے کے لئے عوامی شعور کی بیداری کے علاوہ معذور افراد کو نارمل زندگی گذارنے میں مدد دے رہے ہیںاس ضمن میں آغوش اسکول اسٹیل ٹاﺅن کا کردار بڑا مثالی رہا ہے۔ ان خیالات کا اظہار انہوں نے گورنر ہاﺅس میں آغوش اسکول اسٹیل ٹاﺅن کے اسپیشل بچوں سے ملاقات میں ان سے گفتگو کرتے ہوئے کیا آج شام گورنر ہاﺅس میں آغو ش اسکول کے 50 بچے اپنے اساتذہ کے ہمراہ گورنر سندھ سے ملا قات کے لئے تشریف لائے تھے۔ گورنر سندھ نے کہا کہ اسپیشل بچوں کی خدمت اور انھیں معاشرے میں ایک کا ر آمد فرد بنانا ہم سب کی ذمہ داری ہے ۔ انہوں نے کہاکہ آغوش اسکول میں زیر تعلیم و فنی تربیت حاصل کرنے والے بچے عالمی مقابلوں میں نمایاں پوزیشن حاصل کرکے پاکستان کا نام روشن کررہے ہیں جو قابل ستائش ہے۔ ملاقات میں آغو ش اسکول کی پرنسپل شہناز آپا نے عالمی مقابلوں میں نمایاں پوزیشن حاصل کرنے والے بچوں کا تعارف کرایا گورنر سندھ نے فرداً فرداً بچوں سے مصافحہ کیا اور انھیں شاباش دی۔گورنر سندھ کچھ دیر بچوں میں گھل مل گئے بچوں نے گورنر سندھ کو اپنے درمیان دیکھ کر خوشی کا اظہار کیااور فوٹو گراف بھی بنوائی ۔ گورنرسندھ نے آغوش اسکول کے تمام بچوں کو عید ی دی اور نعت و قرات کرنے والے بچوں کو خصوصی انعام بھی دیا ۔ آغوش اسکول کی پرنسپل شہناز آپا نے اپنے اسکول اور اسپیشل بچوں کے لئے گرانٹ کی رقم میں اضافے اور دیگر سہولیات کی فراہمی پر گورنر سندھ کا شکریہ ادا کیا ۔