کراچی(این این آئی)پاکستان انٹرنیشنل ایئرلائن پی آئی اے نے وسطی ایشیائی ممالک کیلئے پروازوں میں اضافہ کا فیصلہ کیاہے۔پی آئی اے نے پہلے مرحلے میں افغانستان کابل کیلئے اپنی پروازوں میں اضافہ کرتے ہوئے ہفتہ وار

5پروازیں کردی ہیں۔ترجمان پی آئی اے عبداللہ خان کے مطابق دوسرے مرحلے میں پی آئی اے افغانستان کیلئے روزانہ کی بنیاد پر ہفتہ وار 7پروازیں آپریٹ کرے گی۔ پی آئی اے نے آذربائیجان کے شہر باکو کیلئے 14مارچ سے پروازوں کا اعلان کر دیا ہے۔ پی آئی اے لاہور سے باکو کیلئے براہ راست ہفتہ وار دو پروازیں آپریٹ کرے گی۔باکو کیلئے پروازیں شروع کرنے کے لئے مسافروں کو سفری سہولت کے ساتھ پی آئی اے کے زرمبادلہ میں بھی اضافہ ہوگا۔پی آئی اے ازبکستان کے شہر تاشقند کیلئے 28مارچ سے اپنا فضائی آپریشن شروع کر رہی ہے۔ لاہور سے تاشقند کیلئے ہفتہ وار 2پروازیں آپریٹ کی جائیں گی۔پی آئی اے نے سمرقند بخارا کیلئے مزید پروازوں کی اجازت طلب کی ہے۔ سمرقند اور بخارا کیلئے مذہبی ،سیاحت کیلئے اپنی فلائٹیں آپریٹ کریگی۔