لاہور(نیوزڈیسک) عمران خان کے بعد چوہدری سرورنے بھی ن لیگ کوباﺅنسرپرباﺅنسرمارناشروع کردیئے .تحریک انصاف کے صوبائی آرگنائزر چوہدری محمد سرور نے پارٹی میں مالی کرپشن اور ڈسپلن کی خلاف ورزی پر سخت کارروائی کے لئے چوہدری محمدیعقوب کی سربراہی میں تین رکنی ”ایتھکس”کمیٹی قائم کرتے ہوئے کہا ہے کہ پارٹی میں کسی بھی صورت مالی بد عنوانی برداشت نہیں کی جائے گی اور بلدیاتی انتخابات میں کسی بھی مالیاتی ادارے کے نا دہندہ شخص کو ٹکٹ نہیں دیں گے۔ پنجاب حکومت (ن) لیگ کے ہارے لوگوں کو بھی ترقیاتی فنڈز دے کر سب سے بڑی دھاندلی کا آغاز کر رہی ہے الیکشن کمیشن کو اس کا سختی سے نوٹس لینا چاہیے ۔ پاکستان کی تاریخ میں پہلی مرتبہ خیبر پختوانخواہ کی حکومت نے دو وزراء کو ہتھکڑیاں لگوائیں اور ثابت کردیا کہ شفاف احتساب ہر صورت ہوگا۔ تحریک انصاف میں کسی نے بھی قرضہ معاف نہیں کرایا ہمارا دامن صاف ہے ۔ بلدیاتی انتخابات کے لئے درخواستوں کی وصولی 25جولائی تک ہو گی ۔20اگست کو امیدواروں کی حتمی فہرست جاری کر دی جائے گی ۔ وہ ہفتہ کے روز تحریک انصاف کے ضلعی آرگنائزرز کنونشن کے اجلاس کے بعد پریس کانفرنس سے خطاب کر رہے تھے۔ اس موقع پر ڈپٹی آرگنائزر محمد سبطین خان ،عمر سرفراز چیمہ،اپوزیشن لیڈر میاں محمود الرشید، پنجاب شعبہ خواتین کی صدر سلونی بخاری’آئی ایس ایف پنجاب کے صدر وقاص افتخار بٹ اور دیگر بھی موجود تھے۔ چوہدری محمد سرور نے کہا کہ پارٹی میں ڈسپلن کی خلاف ورزی اور مالی بدعنوانی پر سخت ایکشن کے لئے چوہدری محمد یعقوب ‘بریگیڈئیر (ر) ممتاز کاہلوں اور حامد زمان پر مشتمل تین رکنی کمیٹی بنائی ہے جو کسی بھی درخواست پر سات روز میں فیصلہ کرنے اور ذمہ دار کے خلاف کارروائی کی پابند ہو گی ۔ انہوں نے کہا کہ شفاف انتخابات کے لئے ضروری ہے کہ بائیو میٹرک سسٹم لایا جائے لیکن موجودہ حکمرانوں کی طرح ماضی کے حکمران بھی عوام کے ووٹوں سے نہیں دھاندلی کے ذریعے جیتتے آئے ہیں اس لئے یہ شفاف انتخابات نہیں چاہتے ۔ ایک سوال کے جواب میں ان کا کہنا تھاکہ ہم توقع کرتے ہیں کہ وفاقی اور صوبائی الیکشن کمیشنز پنجاب میں ہونے والے بلدیاتی انتخابات کو شفاف بنائیں گے اور کسی قسم کی شکایت کا موقع نہیں دیا جائے گا لیکن پنجاب حکومت تحریک انصاف سمیت اپوزیشن کی دیگر جماعتوں کے اراکین اسمبلی کو ترقیاتی فنڈز دینے کی بجائے ہارے ہوئے اپنے لوگوںکو فنڈز دے رہی ہے جس سے یہ ثابت ہوتا ہے کہ حکمرانوں نے ابھی سے ہی دھاندلی کا منصوبہ شروع کر دیا ہے اور الیکشن کمیشن کو اس کا سخت نوٹس لینا چاہیے ۔ انہوںنے کہا کہ تحریک انصاف اقتدارمیں آ کر قوم سے تمام وعدے پورے کرے گی ۔ موجودہ حکمرانوں نے چھ ماہ میں بجلی کی لوڈ شیڈنگ کے خاتمے کا نعرہ لگایا لیکن وہ آج تک کوئی بھی وعدہ پورا نہیں کر سکے اور ان کی کارکردگی صفر ہے ۔ انہوںنے کہا کہ ہم اس بات کو تسلیم کرتے ہیں کہ کنٹونمنٹ بورڈز کے بلدیاتی انتخابات اور عام انتخابات 2013ء میں ہم سے غلطیاں ہوئیں لیکن آئندہ ٹکٹوں کی تقسیم سمیت تمام امور اور فیصلے کارکنوں کی مشاورت اور مکمل طور پر میرٹ ہوں گے