لاہور (نیوزڈیسک) صوبائی دارلحکومت میں کاﺅنٹر ٹیررازم ڈیپارٹمنٹ نے کارروائی کرتے ہوئے واہگہ بارڈر خود کش دھماکے میں ملوث 2دہشت گردوں کو گرفتار کر لیا ، دونوں دہشت گرد وں نے خود کش حملہ آوروں کو پناہ دی تھی جبکہ دھماکے سے قبل واہگہ بارڈر جا کر ریکی بھی کرتے رہے ۔ نجی ٹی وی کے مطابق سی ٹی ڈی نے لاہور میں لاری اڈہ پر کارروائی کر کے واہگہ بارڈ دھماکے میں ملوث دو دہشت گردوں حسینا خان اور سعید جان کو گرفتار کر لیا ۔ دہشت گردوں کے قبضے سے دھماکہ خیز مواد ، ڈیٹو نیٹرز اور ہینڈ گرینیڈز برآمد کر لیے گئے ہیں ۔ نجی ٹی وی کے مطابق دونوں گرفتار دہشت گردوں نے واہگہ بارڈر خود کش حملے آوروں کے سہولت کار کا کام کیا اور خود کش حملہ آوروں کو پناہ دی تھی جبکہ دونوں دھماکے سے قبل واہگہ بارڈر جا کر ریکی بھی کرتے رہے ۔ دونوں دہشت گردوں کو تفتیش کے لئے نامعلوم مقام پر منتقل کر دیا گیا ہے ۔