اسلام آباد(نیوزڈیسک) سینٹ کی داخلہ وانسداد منشیات کمیٹی کےاجلاس میں ملک میں منشیات کے انسدادی اقدامات پر تفصیل سے بحث ہوتی رہی، اس دوران اے این پی کے سینیٹر شاہی سید کی بزلہ سنجی بھی جار ی رہی، ڈی جی اے این ایف نے بریفنگ میں کہاکہ سعودی عرب میں منشیات فروشوں کے سر قلم کئے جاتے ہیں مگر لوگ پھر بھی منشیات لے کرجاتے ہیں، سینیٹر شاہی سید نے برجستہ کہاکہ پٹھان کا موقف ہے کہ ایسے سر کا جسم پر کیا فائدہ جو پیسے نہ کما سکے، ایسا سرقلم ہی ہوجانا چاہیے، پارلیمانی کمیٹی کے چیئرمین سینیٹر رحمان ملک کا کہناتھا کہ تمام خرابیوں کی جڑ افغانستان ہے وہاں سے دہشت گردی اور منشیات آتی ہیں ، سینیٹر شاہی سید نے لقمہ دیا کہ افغانستان ہمارا پانچواں صوبہ ہے، سینیٹر رحمان ملک نے اختلاف کیا ،نہیں ایسا نہیں ہے، پارلیمانی اجلاس میں یہ سنسنی خیز انکشاف ہواکہ اسلام آباد میں ایک اعلیٰ شخصیت کی دعوت میں مشروبات کےساتھ ہیروئن کی پڑیاں بھی شرکاء کو پیش کی گئی تھیں انسداد منشیات فورس نے مقدمہ درج کرلیا،معروف تحقیقاتی صحافی طاہرخلیل کے مطابق چیئرمین کمیٹی سینیٹر رحمان ملک نے مشروبات کے ساتھ ہیروئن کی پڑیاں پیش کرنے کےواقعہ پر اظہار تشویش کیااور ہدایت کی کہ آئندہ اجلاس میں ایسے واقعات کی تفصیلی رپورٹ کسی دبائو کے بغیر پیش کی جائے، سینیٹر رحمان ملک کا کہنا تھا کہ افغانستان میں پوست کی کاشت میں بھی طالبان کے تعاون سےاضافہ ہوا البتہ یہ ملا عمر کے دور میں کم ہوئی تھی، 39افراد روز انہ دہشت گردی اور7 افراد منشیات کی وجہ سے مرتے ہیں، چیئرمین کمیٹی نے ہدایت کی کہ منشیات کے 106 بڑے سمگلروں کے بارے میں ان کیمرہ بریفنگ اجلاس بلایا جائے گا