ریاض (آن لائن) دنیا کی 20 بڑی معیشتوں کے حامل ممالک کے گروپ (جی 20) نے غریب ترقی پذیر ممالک پر واجب الادا قرضے مزید 6 ماہ تک منجمد کرنے کا اعلان کیا ہے۔ غیر ملکی خبر رساں ادارے کے مطابق اس بات کا اعلان سعودی وزیر خزانہ محمد الجدان نے ریاض میں ہونے والے جی 20 ممالک کے وزرائے خزانہ اور مرکزی بینکوں کے گورنرز کے اجلاس کے بعد کیا۔
محمد الجدان کا کہنا تھاکہ اس سے قبل اپریل میں کورونا وائرس کے باعث پیدا شدہ معاشی صورتحال کے باعث جی 20 ممالک نے غریب ممالک کے قرضے دسمبر تک منجمد کرنے کا اعلان کیا تھا اوراب ہم نے فیصلہ کیا ہے کہ قرضوں کی ادائیگی میں نرمی کی سہولت میں جون 2021 تک توسیع کر دی جائے۔جی 20 ممالک کی جانب سے جاری اعلامیے میں کہا گیا ہے کہ قرضوں کی ادائیگی میں نرمی کی سہولت میں توسیع کورونا کے باعث پیدا ہونے والی صورتحال کے باعث دی گئی ہے اور اس کا وقت دسمبر 2021 تک بھی بڑھایا جا سکتا ہے۔یورپین نیٹ ورک آن ڈیٹ اینڈ ڈویلپمنٹ کا کہنا ہے کہ اس رعایت کیلئے دنیا بھر سے 46 ممالک کو منتخب کیا گیا ہے جن میں زیادہ تر افریقی ممالک ہیں۔جی 20 ممالک کی جانب سے یہ اعلان عالمی بینک اور دیگر عالمی تنظیموں کے مطالبے کے بعد کیا گیا ہے جب کہ بعض اداروں نے تو یہ سہولت 2022 تک فراہم کرنے کا بھی مطالبہ کیا ہے۔واضح رہے کہ گذشتہ ماہ وزیراعظم عمران خان نے بھی کورونا سے متعلق اقوام متحدہ کے اجلاس سے خطاب میں کہا تھا کہ غریب ممالک کورونا بحران سے سب سے زیادہ متاثر ہوئے ہیں لہٰذا جی 20 گروپ کی طرف سے قرضوں میں نرمی میں کم ازکم ایک سال کی توسیع کی جائے۔اس طرح وزیراعظم پاکستان کی سن لی گئی اور ایک سال کی بجائے چھ ماہ کی مزید چھوٹ دے دی گئی۔ سعودی وزیر خزانہ محمد الجدان نے ریاض میں ہونے والے جی 20 ممالک کے وزرائے خزانہ اور مرکزی بینکوں کے گورنرز کے اجلاس کے بعد کیا۔
