دبئی (مانیٹرنگ ڈیسک) متحدہ عرب امارات میں شدید گرمی پڑتی ہے اور اس کا دنیا کے گرم ترین خطوں میں شمار ہوتا ہے، متحدہ عرب امارات کے محکمہ موسمیات نے وہاں کے عوام کو خوشخبری سنا دی ہے، محکمہ موسمیات نے بارشوں کی نوید سناتے ہوئے کہا کہ لوگ فوراً اپنی چھتریاں اور رین کوٹ نکال لیں، کہا گیا ہے کہ 16 اکتوبر 2020ء سے برسات کا سلسلہ شروع

ہو گا اور یہ سلسلہ چھ دسمبر تک جاری رہنے کی توقع ہے۔ فلکیات اورسپیس سائنسز کی عرب یونین کے ایک ممبر ابراہیم الجروان کا کہنا ہے کہ برسات کے اس سلسلے کو الوسم کا نام دیاجاتا ہے۔انہوں نے کہا کہ یہ ظاہر کرتا ہے کہ اب گرمی کم ہو جائے گی اور موسم انتہائی خوشگوار ہو جائے گا، اس طرح متحدہ عرب امارات کے گرمی کے ستائے لوگوں کے لئے یہ بہت بڑی خوشخبری ہے۔ دوسری جانب کمبوڈیا میں سیلاب سے 16 افراد ہلاک ہو گئے، ہزاروں ایکڑ رقبہ زیرِ آب آ گیا جس کے سبب ہزاروں افراد محفوظ مقامات کی جانب نقل مکانی پر مجبور ہو گئے۔میڈپارپورٹس کے مطابق جنوب مشرقی ایشیا کے ملک کمبوڈیا کے مغربی صوبے میں سیلاب سے بڑے پیمانے پر تباہی ہوئی ہے، سکیورٹی اہلکاروں نے پانی میں پھنسے افراد کو نکالنے کے لیے امدادی مہم شروع کر دی جس کے دوران امدادی کارکن کھانے پینے کی اشیا متاثرہ علاقوں میں تقسیم کرتے رہے جبکہ ہزاروں افراد کو محفوظ مقامات تک پہنچانے کا کام جاری ہے۔حکومت نے شدید بارشوں کی وجہ سے آنے والے سیلاب سے متاثرہ علاقوں میں ہنگامی حالت نافذ کر دی ہے، متاثرہ علاقوں میں آسمانی بجلی گرنے سے بھی ہلاکتوں کی اطلاعات ہیں۔ کمبوڈیا کے سرکاری اداروں کے مطابق موسلادھار بارشیں کئی دنوں سے جاری ہیں جس کے سبب امدادی کاموں میں مشکلات اور ہنگامی صورتحال مزید جاری رہنے کا خدشہ ہے۔واضح رہے کہ کمبوڈیا کے ہمسایہ ملک تھائی لینڈ میں بھی بارشوں کے سبب سیلابی صورتحال کا سامنا ہے۔