اسلام آباد(پ ر )وزیراعلی پنجاب عثمان بزدار نے کہا ہے کہ احتیاطی تدابیر کو نظرانداز کرنے سے کورونا کے کیسوں میں اضافے کا خدشہ ہے، کورونا کی دوسری لہر کے خدشے کے پیش نظر احتیاط بے حد ضروری ہے، عوامی مقامات پر ماسک کا استعمال ناگزیر ہے۔

انہوں نے کہا ہے کہ ماسک اور سماجی فاصلے کو عادت بنا کر کوروناسے محفوظ رہا جاسکتا ہے ، پنجاب میں اللہ تعالیٰ کے فضل و کرم سے صورتحال کنٹرول میں ہے، پنجاب میں 24گھنٹے میں کورونا کے دو مریض جاں بحق ہوئے،24 گھنٹے میں صوبے میں کورونا کے115 نئے کیس سامنے آئے، صوبے میں کورونا کے ایکٹو مریضوں کی تعداد1814 ہے ، پنجاب میں اب تک کورونا کے 96089 مریض صحت یاب ہوچکے ہیں۔وزیراعلی پنجاب کا مزید کہنا تھا کہ پنجاب میں اب تک1318330 کورونا ٹیسٹ کئے گئے ہیں۔ گزشتہ 24گھنٹے کے دوران10066 ٹیسٹ کئے گئے،پنجاب میں اب تک کورونا کے باعث 2245 مریض جاں بحق ہو چکے ہیں۔