فیصل آباد (این این آئی)ڈپٹی اسپیکر قومی اسمبلی قاسم سوری نے کہا ہے کہ بھارت میں اقلیتیں خوف کا شکار ہیں ،نریندر مودی کی حکومت کشمیریوں پر ظلم کررہی ہے۔میڈیا سے گفتگو میں قاسم سوری نے کہاکہ سرحدوں کی حفاظت کیلئے پوری قوم پاک فوج کے شانہ بشانہ ہے۔
انہوں نے کہاکہ پی ٹی آئی حکومت کی مثبت حکمت عملی اور پالیسیوں سے کورونا وائرس پر قابو پایا ہے۔ڈپٹی اسپیکر قومی اسمبلی نے کہاکہ کراچی کے حالات کو بہتر کرنے کی منصوبہ بندی پر عمل درآمد ہوگا۔انہوںنے کہاکہ بارشوں سے متاثرہ علاقوں میں حکومت کی طرف اقدامات کیے جارہے ہیں۔قاسم سوری نے کہاکہ پاکستان کو گرے لسٹ سے نکالنے کیلیے حکومت کوشش کر رہی ہے، قومی اسمبلی آئندہ اجلاس میں ایف اے ٹی ایف قانون سازی بل منظور کرلیا جائیگا۔انہوں نے کہاکہ جہانگیر ترین ہمارے ساتھی ہیں ،ان کا نام چینی اسکینڈل میں آیا ہے، وہ اس حوالے سے جواب دہ ہیں۔
